政制及內地事務局局長曾國衞噚日明顯冇食藥，皆因上年11月底林鄭喺立法會發表《施政報告》嗰陣，佢被影到進入熟睡狀態，佢回應傳媒時解釋因為食咗藥，所以狀態比較差。事隔兩個月，曾國衞再喺立會聽林鄭答問，鬼打都冇咁精神咁喎，八方所見，佢幾乎全程處於抄寫狀態，寫咗一張又一張嘅A4紙筆記，更一度向身邊嘅發展局局長黃偉綸借筆抄寫。
睇返吖，國家主席習近平去年底喺「深圳經濟特區建立40周年慶祝大會」發表講話時，包括曾國衞在內嘅台下一眾港府官員，都被央視影到排排坐似學生哥咁抄筆記，而當時曾國衞同特首辦主任陳國基個頭就俯得最低最「勤奮」，而噚日除咗曾國衞，唔少局長都有抄筆記，唔通係怕睡魔急call出洋相？冇理由係林鄭短短兩個月之間，地位升到習大大層次啩？
官員就「勤奮」抄筆記，建制議員就話之你，繼續一邊開會、一邊「各自各精采」，好似自由黨張宇人咁，就曾經拎部電話出嚟睇張馬會彩票相，唔知係咪對緊有冇中獎呢？而民建聯黃定光一如以往，再被影到喺議會「閉目養神」。
上次林鄭讀《施政報告》時掛住訂大閘蟹嘅經民聯張華峰，噚日被影到疑似約咗人飯局，《立場》影到佢開會期間收到友人喺群組傳來短訊，以「4/2」開頭嘅群組中，有人以英文表示啱啱買好餸，返緊屋企準備，相中可見唔計張華峰，群組有三、四個人。
李八方