封繼續玩，封街與仆街一線牽，幾多小店捱唔住，過唔到年廿九要即執呢？
喪封唔停，染髮哥洗濕個頭包住保鮮紙獲准回家。年輕人呢，倒帶回去2019，同一個區，食晒TG的後生仔，保鮮紙已經包唔住出煙的手臂，包頭的是血流披面的街坊。當時守住街口的是防暴，今日大陣仗監督封區的，是剛升職西九龍的指揮官陶輝大人。西九龍中心肥婆四與哨牙珍，真係好很恭喜佢呀。
陶輝一定中意夜香與鴛鴦，深水埗留得住陶輝，請他驚喜現身，時間上極巧合，明顯是向葉劉那一批打手亮棍，唔承認雙重國籍嗎？挑！信佢哋一成，唔會叻過賀一誠！陶輝出巡，就知国安法溝埋PK漏口講出「知法犯法」實情，西環×武警管治，大震懾收效，震走晒二等公民去英倫捱騾仔，正宗大英聯合帝國裔的陶大人，不動如山，封守香城。持外國護照唔怕雙重，甚至七重又點啫，只要腦袋夠紅，唔止差佬，闊佬一樣紅運當頭。有錢佬鎖返好本外國護照，比譚耀宗瞓得更好。留島的有錢人如唐生，敏感體質最熟水溫；平賣資產的何生，卻哀歎太遲見到陶輝，肉赤的感覺猶如被防暴的大腳踢春袋！星島擇定吉時，改名做留島。