有咗二人一枱吃飯限聚令之後，左丁山有兩個定期飯局停咗好耐，其中一個銀行老兵飯局一年來只舉辦過兩次，另一個校友飯局亦取消咗幾個月。公子L雖然係港大人，但參加我哋中大中環人飯局都有二十幾年，呢日佢來短訊：「冇見咁耐，好悶，有冇時間食番餐飯？」又好噃，於是由公子L訂枱，佢話食乜就食乜。
公子L住在東區，對銅鑼灣食肆瞭如指掌，來電話訂咗希雲街一間日本餐廳「旭」Kyoku。邊度係希雲街？左丁山從未去過，銅鑼灣地鐵站F1出口行出嚟去利園三期，左望右望都見唔到，卒之要問一間餃子店嘅阿嬸，阿嬸話禮頓道出富豪酒店嗰邊，一條橫街，好短，倔頭嘅。照足指示，搵到嘞，但成條住宅街，邊有靚日本餐廳呀？卒之望到街尾有新建豪宅，似樣噃，摸到去，果然就係「旭」，門口泊咗靚車，包括紅色波子，公子L都算好介紹。
在鐵板燒枱坐下，公子L：「對唔住，我唔知你對銅鑼灣咁陌生。」係大鄉里啲嘅，不過開辦高級日本壽司/鐵板燒店，居然在如此街道而非在開平道或新寧道，一定係好有把炮嘅喇！果然，公子L話：「呢間舖中午幾旺㗎，要分兩輪訂位，所以今日要食早，中午12點就坐響度。」鐵板燒幾啱是日天氣（十度左右），套餐有南非鮑魚、龍蝦、牛肉、炒飯，十分正宗。12點呢輪，鐵板燒枱坐滿人，壽司枱亦目測得番一兩個位無客嘅啫，香港人真係識食，有咗口碑，咁唔就腳嘅地方都有食客聞風而至，可惜有疫情攔路，夜晚冇生意都幾難賺錢咯。
一點半之後，第二輪食客殺到，其中一位單身漢坐在幾呎以外，左丁山不以為意，同公子L食得興起，講說話大聲咗，單身漢立即揚手：「我認得你把聲，係唔係左丁山呀？」唔通唔認咩！於是話係，單身漢介紹自己：「我都係新亞畢業㗎，我日日睇你專欄。」咁好？做盛行呀？新亞師弟話：「我做開private banking嘅，退休冇幾耐，好得閒，聽人介紹走嚟呢度食鐵板燒！」交談之下，大家有一共通點，就係香港有低氣壓壓住心頭，心情總係不舒暢，理由為何？不必畫出腸！師弟話好彩出道早，得到香港經濟紅利，現在有資格以美食來解愁，但好擔心中大師弟妹，呢兩年畢業嘅，如何搵到希望？公子L立即舉手：「飲杯飲杯。」飲綠茶能消萬古愁，我哋係小人物，不是范仲淹也。