【名家足路】
【對決場次︰阿士東維拉vs水晶宮】
上期《一燈決》法蘭克福贏咗奧格斯堡，玩咗三期終於開齋，講真我都有啲激動同開心。嚟到今個月最後一期，希望可食住個勢贏多場，同筋肉人打個和啦。今次我哋揀咗阿士東維拉對水晶宮，我就要水晶宮下盤。
水晶宮上場俾利物浦喺主場血洗7:0，表現確實唔係太好，搞到領隊鶴臣都坐喺場邊輸到冷笑。不過正所謂絕處逢生，我諗球隊今場都會打醒十二分精神，應該搶到分嘅。其實喺輸畀利物浦之前，水晶宮走勢都算幾好，保持三場不敗，特別係逼和熱刺嗰場，下半場個勢真係幾厲害。同埋水晶宮近期作客表現唔錯，近2場1勝1和保持不敗，加上往績鬥維拉都係一球上落多，對上4次交手都係各贏2場，證明落到場都係五五波。
近期喺英超倒戈嘅球員好似特別醒神，修咸頓嘅禾確特同愛華頓嘅伊禾比對住前東家阿仙奴表現同樣唔錯。今場水晶宮就有賓迪基坐完波監復出倒戈，呢位比利時前鋒近期腳風唔錯，對韋斯咸2黃1紅前都入咗球，佢今場復出拍住韋費特沙夏都算係今季水晶宮最勁嘅鋒線組合，後者呢位科特迪瓦前鋒係球隊今季嘅首席射手，今季有七個聯賽入球，五球都係作客入，今場嚟到維拉公園球場，睇好佢入到波。
至於維拉，雖然上場作客大勝西布朗3:0，不過人哋35分鐘已經紅牌打少個，加上對方只係啱啱換領隊，贏波嘅說服力唔太高。維拉主場表現仲要唔係好掂，近四場冇贏過，只得1和3負，對住般尼同白禮頓都贏唔到，唔睇好。
文：港生
《一燈決》係今季新欄目，由上月擂台盟主同上月燈神拗吓頸，睇吓讀者信邊個。