喺立法會開會時一係無人發現佢存在，到發現時又多數見佢瞓緊覺嘅進出口界民建聯議員黃定光，唔知係咪家陣立法會冇晒反對派，令佢瞓覺機會大減，所以要認真「扮」工，噚日喺振興香港經濟事宜小組委員會舉行首次會議時就語出驚人，係香港經濟出謀獻策時拋出高見，認為政府要關注「乜色經濟圈」，話以前有人提呢啲謬論，政府如果唔澄清同採取措施畀佢發展落去，「會達到認真破壞效果」。
大家聽完係咪唔知佢想噏乜呢？八方都係呀，亦唔知佢講嘅乜色究竟係咩色，但就知今日香港，除咗有黃營嘅黃色經濟圈，仲有建制派專亂噏同放假新聞嘅KOL提倡過藍色經濟圈，亦有中資主導嘅紅色經濟圈，阿定光唔通想叫政府打擊紅藍色經濟圈？係咪唔愛國愛黨啦？
八方就大膽估，其實係有人眼紅黃色經濟圈發展潛力驚人，所以想逼政府使橫手打壓，不過官媒一早講過，黃色經濟圈係死路一條，阿定光似乎打算作反同官方研判對着幹，擺明車馬話官方有錯。其實想點樣消費，明明係香港人嘅自由選擇，又關你定光乜事先？難怪有網民提議佢都係「專心冬眠喇」。話時話，阿定光似乎膽小如鼠，連講嘢都好小心，個「黃」字唔敢講出口，既然驚成咁，唔知有冇諗吓自己不如改埋名叫「乜定光」呢？
李八方