失落今屆FIFA年度最佳男子球員獎嘅美斯，上周六喺西甲雖然有一球進賬，累積為巴塞隆拿入咗643球，追平球王比利嘅單一球會入球紀錄，但巴塞最終都係俾華倫西亞逼和2:2，再失兩分。出名「烏鴉口」嘅比利之後大讚美斯，只怕祝福變咒語，呢位阿根廷前鋒表現幾好都救唔到巴塞全家。
季前鬧出「塞」風波嘅美斯，今季表現認真麻麻，巴塞暫時更脫離咗聯賽爭冠之列咁。佢哋今場對住華倫都踢得好辛苦，美斯上半場補時階段仲射失12碼，好彩最終成功補中，先入到個人喺巴塞第643球，追平咗比利喺山度士保持嘅單一球會入球紀錄，可惜嘅係，巴塞最終都係被華倫逼和2:2。
更加唔好彩嘅係，向來「讚邊個，衰邊個」嘅比利之後喺社交網站出post，大讚呢位後輩多年嚟一直都咁深愛巴塞隆拿，喺今時今日嘅球壇已經好少見，所以真係好敬佩對方。巴塞喺教練朗奴高文接手後，13輪聯賽已經失咗18分，戰績仲衰過上手嘅施迪安，𠵱家仲得到比利嘅「烏鴉嘴」加持，睇嚟美斯有排都唔使旨意有運行。
相比之下，喺FIFA頒獎禮攞唔到大獎之後，俾人捉到黑晒面嘅基斯坦奴朗拿度（C朗），上禮拜六就喺意甲入咗兩球，幫祖雲達斯作客大炒帕爾馬4:0，延續今季嘅聯賽不敗強勢。連同呢兩球，C朗喺2020年已經入咗33個聯賽入球，對上一次有球員喺意甲單年入到咁多波，已經要數到喺1961年同樣入咗33球嘅祖記已故名宿施禾利。心情靚靚嘅C朗賽後喺ig出咗張靚相，慶祝上場和波嘅祖記重響勝鼓，結果短短1個鐘內就吸咗超過200萬個Like，認真犀利。
講到犀利當然就唔少得羅拔利雲度夫斯基，呢位新鮮出爐嘅FIFA最佳球員上星期六就喺德甲梅開二度，包括喺補時三分鐘建下奇功，幫拜仁慕尼黑絕殺利華古遜，力壓對方重上聯賽榜首。德甲踢完呢輪就會放聖誕假，出年先會再有比賽，今季喺聯賽已經入咗17球、俾隊友叫做利雲Goal夫斯基（Lewangoalski）嘅羅拔仔就講明，出年要繼續爭取更多入球。