【本報訊】相愛三十多年，今年是Stella首個無法與丈夫共聚的冬至。丈夫在三年前患上認知障礙症，身為在職照顧者的她，無奈地還是需將丈夫送至安老院舍讓人照顧。過往，她每日下班後總會到院舍探訪，放假日子又會帶丈夫外出。只是疫症爆發後，一切再不一樣，「佢情緒上好唔開心，𠵱家亦都要坐輪椅」。
疫潮之初，Stella記得，她仍然能夠到安老院舍探望丈夫，院舍只是把探訪的時間縮短，「中間都可以帶屋企人出去食嘢，之後就將每個探訪家庭隔開兩、三米，我哋去探訪時，要先喺reception換新口罩、洗手之後戴手套、穿保護衣或者雨衣，確保係乾淨情況下去探屋企人」，探訪時間亦由最初的30分鐘，到最後減至15分鐘，「會爭取時間同佢傾吓偈，帶嘢上去畀佢食」。
自7月宣佈禁止探訪，Stella形容當時感到晴天霹靂，心裏清楚明白，對居於安老院舍的長者而言，因為無法近距離接觸到家人，會有一種被遺棄的感覺，「由於我先生係認知障礙中晚期，以前佢都仲會認得我，之後探唔到，𠵱家佢只係叫我做四眼妹」，雖然明白認知障礙患者會慢慢衰退，然而疫情亦確切地加劇了整個變化，「其實真係會覺得好痛，但都感恩佢仲會認得我呢個眼鏡，會叫我做四眼妹，但呢一刻對家人嚟講都係幾心悒」。
在院舍裏的丈夫，由於沒有家人的探訪，情緒也變得越來越負面，「佢情緒上好唔開心，有少少𤷪，都曾經試過打姑娘」。除了心理上，身體上也出現了變化，在禁止探訪之前，Stella的丈夫仍然可以枴杖支撐代步，「但𠵱家已經要用輪椅出入」。
在社會福利署7月發出的指引中，有提及院舍應盡量協助親屬透過電話或視像通訊等聯絡院友，只是視像通話的方式，事實上並非人人都適合，「認知障礙中晚期嘅人係唔識得視像，先生會將個電話放咗喺耳邊，唔講嘢，咁樣係無意思」。現時Stella只能每周到安老院舍，隔着玻璃門與丈夫遙遙相見，但在雙方都戴上口罩的情況下，只能透過肢體語言溝通。
第三波疫潮緩和之後，Stella曾經心存盼望，等待有一天可以再次親身探望丈夫，「由當初二人限聚，不斷放寬去到四人、六人嘅時候，都有諗過會唔會等到院舍可以放寬探訪，既然政府都可以放寬迪士尼、酒樓，但我哋就連探望屋企人，講兩句說話都無機會……」
這樣的盼望，隨着第四波疫潮爆發下落空，「到𠵱家又收緊，又講緊過百宗爆發，我哋個心真係好痛，已經半年啦，唔知仲有幾耐……」說着說着，Stella哽咽起來，她希望香港市民也能做好防疫措施，以減少感染個案，「因為疲累可能令大家鬆懈，但都希望大家幫吓手，做返好自己，戴返好口罩、勤洗手，等疫情慢慢減緩，我哋見屋企人機會就會大好多」。