要研究月事假這個課題，或許先要理解其痛，對一個男記者尤甚。受訪者C小姐如此形容：「你可以想像係絞肚痛到最痛、最痛嗰下，又未有廁所畀你去。」這種情境確實似曾相識。不過她又補一句：「但都完全唔係嗰個level。」
不僅異性難理解，同性也未必可代入。女攝記聽完C的經痛血淚史，也忍不住嘆一句：「原來可以咁辛苦！」說到底，連藍領、白領假期平等都要等多十年的香港，要推行月事假恐怕路遙，但若在討論中對他人之痛更添同理心，已是萬幸。本報訪問了三位女性，看經痛對她們工作的影響。不同行業的僱主，又如何看月事假？
記者：關冠麒
從事文職工作的90後C小姐（化名）自中學起，每月飽受經痛困擾，自覺情況比身邊朋友嚴重。她描述着肚內的翻騰：「會發冷，然後抽搐痛，一冷一熱咁出嚟。然後個子宮，即係肚對下少少，一路有嘢揑緊你啦，你好想好想撳住佢，淨係想focus喺嗰個area，個腦根本就load唔到。」為紓緩不適，在家她會用水壺裝上熱水，敷在肚上。曾試過因水溫太高，一朝醒來長了個水泡。
止痛藥變成C的必需品，但每年總有幾次就算食盡每日服用上限，依然感到劇痛，甚至偶爾會痛到嘔、屙。過度使用止痛藥，亦令C自覺有依賴情況，藥效變得不顯著。她惟有每兩年就停藥數月，任痛楚肆虐，再服時才能回復藥效。
似病非病，C為此看遍中西醫。西醫幫她做超聲波等檢查，未見任何異常。中醫診斷她氣虛血弱，要服中藥調理，連續試了兩年，使了過萬元，但始終沒有明顯成效。她惟有由日常生活着手，春夏秋冬都不飲凍飲，定期做運動，但嚴重經痛依然如影隨形。
C的經歷在女性當中並非罕有。香港大學醫學院2013年的研究發現，八成本地大學女生會感受到經痛。澳洲昆士蘭大學同年的研究顯示，處於生育期的女性有2%-29%經歷過嚴重的經痛不適，視乎種族和國家而定。倫敦衞生與熱帶醫學院和密歇根大學學者的2004年論文亦指出，3%-20%的女性會因經痛而無法如常上學或上班。
經痛對C的工作當然有嚴重影響。雖然劇痛難耐，C若在工作期間碰上經期不適，她大多會嘗試用意志力捱過。不過C的工作性質需要同時跟多方面聯絡，要隨時清晰知道各項目的進度，經痛令她難以集中，一年總有最少兩三次需要請假、早退，回家攤在床上捱，「我根本就諗唔到嘢，坐喺度都好無謂，不如畀我休息下啦」。
不過，C公司的政策即使一天病假，都要出示醫生紙證明，「第二日秘書問返我攞醫生紙。其實我想講，我飛的返屋企就係想碌床，仲去睇醫生？我同佢講，我唔諗住特登去睇醫生攞張醫生紙去呃你哋」。
雖然公司通常會通融，但C還是會感到壓力，害怕影響旁人對自己的印象，「我試過連續三四個月都早退。佢見個同事成日都發生呢樣嘢，都唔知你係咪『吞泡』，係咪先？其他同事都係照做，點解你唔可以？又攞唔到病假紙出嚟」。
經痛對非文職工作的女僱員影響更大。中西區區議員任嘉兒參選前任職公立醫院急症室護士，偶爾也要在經痛不適期間上班，需要長期敷暖水袋令自己維持工作狀態。
公立醫院工作繁重，人手經常不足，急症室更是令人喘不過氣，「有時連去廁所時間、飲水時間你都唔記得」。任嘉兒試過因此忘記換衞生巾，導致工作期間滲漏，淺色的制服染上血紅，「嗰時係完全地覺得要崩潰。心情去到谷底，咩都唔想做」，長時間不更換衞生巾又會對皮膚和女性器官帶來感染風險。
雖然醫護理應對經期不適有所理解，但他人之痛還是不易明白。任聽過同事對別人因月事請假而指指點點：「咁都要請假呀？」「你請咗sick leave，你啲patient咪要畀我？」任見過同事選擇死撐，打止痛針上陣，也有同事痛至當場暈倒。
她說，醫管局不同部門對請病假是否需醫生紙有不同規定，但睇醫生對於一般經痛實屬不必要，「呢樣嘢係每個女人每個月都會經歷一次嘅嘢，佢身體因為月經嘅影響，其實你係judge唔到」。
同樣在公立醫院急症室工作的九龍城區議員鄺葆賢稱，自己雖然偶爾都要食藥或敷暖包上班，但未有對工作造成太大影響，較辛苦的崗位同事會自動補位。但她亦見過有市民捱着經痛工作，結果要白車送到急症室。
她認為，港人在職場上總習慣死撐，「其實唔舒服唔係夾硬返工先至係叻。健康嘅勞工概念就係，當你覺得自己唔適合返工、唔舒服，你需要唞，呢樣嘢係要去正視。希望我哋透過好啲嘅職場習慣，令到我哋（一般）嘅工作表現足以賺取薪金，而唔係賣完時間，再賣埋器官咁去返工」。
要解決女性生理不適時仍要勉強上班的問題，毋須醫生紙證明的月事假似乎是一個方法，不過全球有法定月事假的國家只有五個。有部份外國企業設月事假政策，全球聘用超過5,000人的食物快遞公司Zomato今年8月就引入有薪月事假，一年上限10天。
形容痛到「懷疑人生」的C小姐說，第一次聽聞外國有月事假時，感到非常羨慕，「我呢個情況經歷咗十幾年，我知暫時我都搣唔甩佢，如果有呢樣嘢我就唔使擔心」。
鄺葆賢亦認為，若有法定月事假令女僱員免除醫生紙的麻煩，而且更容易開口請假，是一件好事，也是一個進步。但她指香港勞工權益落後，在達至這種「先進」的福利前，還有更多更基本的要爭取、要教育。她不下一次見過有人生病，卻因公司只接受公立醫院假紙，而要特地去排六、七小時急症；還有更多人手停口停，放一日病假都覺得奢侈。
很多人對月經不理解，或對宣之於口感到尷尬，鄺葆賢認為：「要更加多嘅溝通，而唔係令人覺得好似特權咁畀咗一班人，呢部份係需要梳理，唔係淨係法例可以解決。」