上星期跑完馬散場，行樓梯走人時碰到馬主C自三樓馬主廂房走出嚟，戴住口罩都認得嘅，互相手踭一碰，馬主C話：「我隻馬星期三出賽，有少少機會。」馬主C乃新亞師弟，與馬主L係宿舍室友，馬主L今季有運，已拉咗三次頭馬，馬主C仍未開齋，希望佢星期三有運啦。
點知到咗星期一，已得馬會通知，11月25、29日，12月2日及6日，非出賽馬主唔可以入場，會員有季枱嘅亦唔入得場，幾冇癮。12月9日夜馬有國際騎師錦標賽，13日係國際大賽，乃一年一度全球賽馬盛事之日，現在因為第四波疫情緊張，到時都唔知會點，相信馬會行政總裁日日要眈天望地，望上天幫忙。馬會防疫措施已做到非常嚴密，馬房人員、練馬師、騎師等一個星期檢測幾次，嚴限馬迷入場，上季至今，賽事得以順利舉行，但係呢？人難勝天，馬會自己做得好亦無用，10月31日萬聖節後出現的士司機群組，上星期爆出更大規模嘅「富婆跳舞群組」，令新冠病毒大爆發。有心水清人士做吓小統計，跳舞群組之女士平均年齡六字頭，男士平均年齡二十零歲，唔知有冇啟發性！大公報大字標題：「富貴場擴散病毒貼身傳染」，副題：「知情者踢爆，找老師好盛行，俄仔搶手」，標題似有玄機（11月23日）噃，當日午飯時收到短訊：「跳舞群組大爆發，你中環人要小心啲！」好彩左丁山呢個中環人唔跳舞好多年咯，從無踏足甚麼dance club。同枱吃飯嘅賓架T就話：「跳舞搶俄仔並非新生事物，某大富豪太太係跳舞狂，成日跟老師去歐洲參觀社交舞大賽，大富豪忍無可忍，話再跳舞就離婚，太太先至忍痛離開舞場。啲俄仔舞技好，功夫好，某些富婆係好鍾意㗎！」
工業大廈之派對房間其實唔容易畀一眾客人跳快華爾滋、探戈等，點知政府識得管制派對房間，識得管制酒吧食肆，對一啲大面積嘅dance club就放任不管，唔通陳肇始離地到連富婆有社交舞場地呢回事都唔知？一姐、局長好似不食人間煙火，市民只能望天長嘆，而今搞到咁大煲，佢哋好在有一國兩制保護，大官我自為之。在內地某市發生此等事情，市長與衞健委一早返屋企食炒魷魚咯。