本月初有外電報道，美國可口可樂公司與中國蒙牛乳業（2319）成立合資公司，取名「可牛了」，搶攻低溫奶市場。「可牛了」喺內地普通話嘅意思係好勁咁解，可口可樂跟蒙牛都係世界知名品牌，強強合作，市場對呢個消息好似無乜大反應。喺雙方合作之前，可口可樂喺中國並未涉足乳製品領域，而中國國產牛乳喺「毒奶粉」事件後形象一落千丈，對蒙牛嚟講，跟國際品牌合作將有助吸引年輕消費者。古天后認為呢個消息對蒙牛嚟講絕對係正面，只係市場忽視咗。
內地乳業市場，下半年乳業需求穩定及市場開支將趨向合理化，蒙牛乳業管理層表示，認為公司下半年液態奶增長勢頭持續，收入增幅有望達雙位數，營運毛利率將提升30至50點子。有報告於6月進行調研顯示，肺炎疫情令民眾更為關注健康，導致內地奶製品需求強於預期，加上內地牛奶供應不足，可能導致內地今年下半年以後液態奶產品有加價趨勢。
鑑於蒙牛乳業喺2020至2022年嘅每股核心盈利複合增長率為40%，其現價相當於預測2021年市盈率為25倍，對比中國/香港消費必需品同業的每股盈利年均複合增長率為18%（預測2021年市盈率為31倍），蒙牛現價估值具有吸引力，仍落後於同業，本年至今其股價僅升15%，落後同業，有條件追落後。
技術走勢方面，蒙牛股價一度升穿42元，目前於10至20日線附近整固，若然回落至38.55元回補裂口，而找到支持，將有再向上升破前高位嘅機會，如能升穿42元有望再創新高，首個目標45元，現價買入，跌穿38元止蝕。
古天后