葡萄牙球星基斯坦奴朗拿度（C朗）近年積極發展CR7酒店業務，最新計劃係2023年喺英國曼徹斯特市再開新酒店，唔知同佢回歸曼聯嘅傳聞有冇關係呢？
其實早喺8月已有指C朗打算喺曼徹斯特起酒店，據英國《太陽報》透露，新酒店嘅藍圖已經落實，呢棟樓高11層、設喺曼市中心北區嘅酒店，將設有150間客房，而且仲有酒吧同天台花園等豪華設施。據報呢間酒店將被評為四星級。報道又引述酒店嘅建築師指，CR7酒店將會有「非常大膽而獨特」嘅設計，以唔同嘅材料、顏色同立體面積比例建造，將成曼市新地標。
不過C朗呢間新酒店就擺明同前兩位曼聯隊友爭生意，事關傑斯同加利尼維利幾年前喺曼市以150萬鎊買咗當地舊證券交易所嘅地段，仲用咗2,000萬鎊翻新同改建成為當地第一間以足球為主題嘅奧脫福足球酒店。C朗今次喺曼巿開酒店，其實都引嚟好多聯想，事關佢之前曾表示希望掛靴前回歸紅魔。而霍士體育資深記者基斯甸馬田引述曼聯內部人士指，紅魔已決定嘗試收購C朗㖭。
另外，國際足協周三公佈本年度FIFA頒獎禮各大獎項嘅候選名單，當中最矚目嘅FIFA年度最佳男子球員11名候選人中，C朗繼續榜上有名，但入面竟有四位球員嚟自利物浦，包括華基爾雲迪積克、穆罕默德沙拿、沙迪奧文尼同今季由歐聯盟主拜仁慕尼黑轉會過檔嘅堤亞高艾簡達拿。不過，講到男子球員攞獎最大熱門，絕對係協助拜仁成為歐聯、德甲及德國盃「三冠王」嘅神射手羅拔利雲度夫斯基，大家12月17日就會知道各大獎項花落誰家。