AC米蘭球星伊巴謙莫域上月尾確診武漢肺炎，佢康復後狀態大勇，接連喺意甲入波。禮拜四伊巴喺ig仲上載咗條片，好霸氣咁叫大家唔好學佢咁去挑戰武肺，要做足防疫措施。不過之後伊巴就甩鬚，歐霸盃對布拉格斯巴達主射12碼宴客，近5次幫AC米蘭操刀12碼第3次失手。好彩AC米蘭最後大勝3:0，今季保持不敗，仲將跨季各項賽事不敗走勢延長至23場。