新亞校友師弟F新近獲批入馬會做賽馬會員（Racing Member）後，本想請友好食飯，但限於4人一枱，只好叫會長Y與左丁山到置地廣場唐人館食填鴨，早於六月時，唐人館大減價，師弟F食過一次填鴨，念念不忘，於是依家又再去。
師弟F屬旅遊界人物，旅遊業已經死得好慘，但師弟F仲好似幾輕鬆噃。呢日着咗一件黑色T，上寫「桂林街」，一望而知係新亞書院紀念品，佢話：「我對新亞懷創校初心㗎！」
歷史唔好講嘞，問佢是否避過一劫？師弟F話：「窮則變，變則通，現在賺唔到錢㗎嘞，搵到錢出糧畀夥計已經好好，能夠繼續撐，希望有更好明天。」
點樣變則通呢？師弟F話幾個月前一間酒店每晚只平均收到三至五間房租金，苦不堪言，搵埋佢度橋救亡，於是腦震盪之下，師弟F諗出一個二人燭光晚餐計劃，情侶吃完浪漫晚餐，送一晚房間。此計劃居然大受歡迎，引起注意，於是有大搞租房送晚餐、早餐之「產品」，到後來就進展到派對餐，Staycation，有一間五星酒店晚晚做party做唔停。
但大量香港本地人趁有大折扣、有優惠入住酒店之後，問題來了，不少住客唔生性，要求過份（例如一個小時call客房部50次要杯、要碗碟），更不堪者就係在房屋內搞到杯盤狼藉，紅酒倒在地氈、牆壁受塗污等等，顯出部份香港人質素差。到後來，政府聞風而至加緊巡查，五星酒店嚴格限制房間內人數，杯碟逐件計錢。有冇因此而趕客呀？師弟F話：「我地幫手做宣傳推廣啫，唔知道賣房真正數目，但酒店經理講番，生意現時係少咗啲，但亦適時省卻不少麻煩，冇所謂啦！」師弟F話不少酒店客似雲來，入住率幾好，但人人都係想做外來遊客生意，目前係搵錢出糧，不得不然啫！
疫情之下，整個旅遊業生態必然改變，疫後，經營模式不會再一樣，所以師弟F已在構思成立旅行社，迎接新一浪。咁夠膽逆市而行，風險甚大噃？師弟F話：「我讀嗰一科文化哲學，教授話西方文化由希臘開始都係要敗亡之後先至會催生新文明、新文化，現在係時候創新嘞！」年輕人係有朝氣嘅，一於鼓勵佢好似件T恤咁，發揮桂林街精神，創造事業。