【名家足路】
【對決場次︰慕遜加柏vsＲＢ萊比錫】
今個月嘅一燈決終於都嚟到尾聲，小弟同燈神筋肉人嘅較量都告一段落，最後一個禮拜就決定用慕遜加柏鬥RB萊比錫嘅德甲比賽嚟做最後對決。有留意今個禮拜嘅歐聯小組賽，都知萊比錫作客曼聯慘吞咗五蛋，不過我覺得呢場敗仗反而激發起球員嘅鬥心，今場一定搵慕遜加柏嚟出氣。加上萊比錫今季喺德甲都仲未輸過，今場讓得嗰平/半真係好筍，一定係撐呢隊德甲不敗之師！
其實周中場歐聯萊比錫本身喺頭70分鐘都同曼聯踢得有來有往，不過喺俾曼聯入咗第二球之後，球隊就已經明顯放棄咗場比賽，防守基本上形同虛設，所以先會出現曼聯喺尾段連入三球嘅難睇局面。不過我相信球隊一定會視呢場慘敗為教訓，嚟緊今個禮拜嘅聯賽一定會醒神番好多。雖然今季萊比錫有射手迪姆華拿離隊，但球隊喺德甲嘅攻擊力完全冇受到影響，今季5場聯賽已經入咗12球，僅次於班霸拜仁慕尼黑，雖然一眾新兵好似黃喜燦同祖斯甸古華特都未有太亮眼表現，但係尤素夫保臣同科斯貝治喺聯賽各入兩球，係值得信賴嘅鋒將。
至於慕遜加柏喺德甲踢咗5輪入球同失球都係8球，顯示出攻守兩端嘅表現都只係一般。而且其中四個入波係來自中場嘅史甸度同莊拿斯荷夫曼，前線嘅馬古斯杜林今季聯賽入得一球，另外幾位前鋒入波都係唔多。而且萊比錫對上四次作客慕遜加柏，全數贏波之餘仲入咗八球，往績可以話係贏到開巷，今場就一定要撐喇！
文：王杰
《一燈決》係今季新欄目，由上月擂台盟主同上月燈神拗吓頸，睇吓讀者信邊個。