近十幾年來，大學商學院及商界唸唸有辭，成日講風險管理（Risk Management），大學仲有呢一個專科學系出現㖭。左丁山見過一啲機構嘅內部「風險管理架構及風險管理指引」，洋洋過萬字，連埋架構圖、流程表，有幾十頁紙咁厚，左丁山睇咗一半就有啲頭暈。
凡事早有準備，總係好嘅，大公司機構搵一個委員會寫「風險管理架構組織」，亦唔簡單，原意係未雨綢繆，危機一來，不會手忙腳亂，唔知點應付。可惜吖，危機真的到了，受直接影響的公司，就係不知如何應付，硬晒軚。好似國泰航空咁，成立於1946年，以為見過無數風浪，點知新冠肺炎疫情一來，全世界停航，生意收入大跌九成幾，你話怎麼辦？即使公司有幾詳細嘅風險管理指引，偏偏就係冇一條關於大流行疫情嘅呢！天意就是天意，大流行疫情一旦肆虐全球，最頂尖嘅航空公司、旅遊巨子、酒店豪強、餐飲米芝蓮三星，即時跪低。人算總係不如天算，國泰既有人禍（石油對沖合約），再遇天災（疫情），神仙難救，唯有大裁員，大改組，希望憑政府財政支持，可以捱過絕境。
國泰重組，乘機修改過去幾唔錯嘅僱傭條件及福利，大力削減之，僱員根本完全失去議價能力，恐怕不得不從了，除非條氣唔順，轉行可也。保險公司、地產代理、物業管理公司立即加強招聘國泰港龍之失業人士，就係一招「趁低吸納」，只是保險代理及地產代理嘅底薪甚低，要跑數，航空服務員幾難去適應。
呢個時候忽然有位黃楚標先生搞「大灣區航空公司」，對蘋果日報及明報講，要力爭執笠港龍之22條內地航權，並開始招兵買馬，直情想做「港龍第二」，似乎最啱港龍人員過檔，而且中環人知道黃楚標已搵咗前港龍退休高層「畀吓意見」，可知其大志。黃楚標正在組織大灣區航空公司，向特區政府申請航空牌照，需「香港空運牌照局」審批（現任主席何沛謙大律師），過往牌照局發牌不易，極其嚴格，黃楚標是否可以攞到牌，仍有疑問，但好明顯，黃楚標背景雄厚，牌照局勢必要受政治影響。林鄭月娥凡事過問，未經特首同意，黃楚標之大灣區航空幾難攞到牌！千萬要記住，所有行政會議成員要申報利益呀，曾蔭權前車可鑑！