【中環在線】秋風起，三蛇肥，但估唔到今次條蛇，唔係出現喺恒生24樓博愛堂廚房，準備泡製太史五蛇羹，而係「蛇」咗去滙豐總行18樓交易室。
華華據聞，昨早喺獅子行炒房樓層，竟然發現青蛇一條，呈蜷曲成蛇餅狀，伏係滙豐紅地顫上，雖然未有吐舌，但震驚程度足夠嚇親上班一族，之後行方已好快搵人處理咗，條蛇現在已送往嘉道理農場動物拯救中心。
滙豐發言人回應，昨早發現一條蛇誤闖總行辦公室，為保障員工安全，行方已立即捕救這條蛇，並把牠移離總行。事件沒有影響正常運作及員工安全，行方亦於大廈進行徹底檢查。不過華華都係有疑問，唔知條蛇點樣爬到上18樓，莫非自己識搭電梯，定有人好心幫佢撳lift，又抑或有人放「蛇」？
滙豐一對銅獅，上周就開廂重光，今日炒房出現青蛇，唔知有乜兆象解讀呢？
李華華