曾揚言跟成龍學做警察，又真係做過老臨、仲喜歡拖馬跟明星足球隊埋堆嘅香港警務處長「PK鄧」鄧炳強，唔知係咪因為警隊洗白工程冇乜成效，所以決定親自出馬，用佢雪藏咗幾十年嘅老臨式演技，走去拍返條片宣傳撐警歌MV。但八方發現網民好似唔多受落，恥笑之餘，仲發現片入面有「彩蛋」，可以令PoPo自打嘴巴。
香港警察官方facebook貼出一條宣傳片，硬sell撐警維穩歌《捍衞香港》，首歌由撐警藍絲鍾鎮濤創作，PoPo嘅facebook仲係咁叫人留意TVB首播，更不忘心繫老細，擦鞋hashtag「處長歌聲令人耳朵懷孕了」。八方睇下條片，PK鄧演技果然同佢幾廿年前喺電影《開心鬼》做過高薪老臨冇乜分別，由頭到尾只係交啲碌大眼皺眉嘅行貨戲，更特登清唱幾句大晒歌喉，咁嘅生硬表演，唔怪得佢要跟成龍學做警察！
不過，條短片有個「彩蛋」，就係PoPo之前出街執行職務，個個唔show委任證，市民、議員叫佢show委任證仲聲大夾惡要拉要鎖，但條宣傳片入面個詭異「彩蛋」就係三個着住便服嘅PoPo，心口居然同時掛咗市民難得一見嘅委任證，出現率仲係100%！八方相信條片係警總範圍內拍，如果唔show委任證係正常，點解撞口撞面係PoPo嘅警總範圍，反而要show委任證？失蹤嘅委任證，又點解只會喺警總範圍內出現返？
李八方