特首林鄭月娥早前話唔介意深圳GDP超越香港，信和置業（083）主席黃志祥噚日出席股東會時，都話深圳GDP超越香港係必然嘅事，主因深圳人口較多，但香港人唔使驚喎︰「如果馬化騰係你鄰居，不知幾開心，我哋（香港）喺深圳隔離亦應該好驕傲！」黃志祥話香港前途非常好，勸大家放眼內地，「唔使驚㗎」；其口吻同林鄭如出一轍。
不過，問到佢係咪支持林鄭連任？黃志祥竟然只係答咗一句：「唔知」。仲好玄咁補充：「香港係一個好地方，有好嘅特區政府，有好嘅特首，支持佢哋！」睇返近日商界對林鄭連任嘅言論，星島集團老闆何柱國話：「天有眼嘅……或者一隻眼開一隻眼閉都未定」。自由黨榮譽主席田北俊更加直接話，「目前獲商界支持者嘅人，均無意選特首。」睇來大家講法唔同，口徑都係一致嘅！
李華華