612基金需要市民幫手，對家律政司用公帑同你打（趁2027年被明日大嶼榨乾庫房前），梗係好打得啦。小市民向612熱心課金，毋忘手足，但鄭司長唔理好醜，連一個小額錢債索償788元的個案都要做大龍鳳，以案件複雜為由申請轉交高院審理。索償的理大學生記者，遭警方用胡椒球彈射爛手機，申索維修費用，只係七嚿水不是七億，律政司堅持移交高院。審裁官認為多嚿魚，高院開庭涉及高昂訟費，一個學生記者怎負擔？司長堅稱原告可請義務律師，遭審裁官打臉駁回：家吓有人話會無條件替他打官司咩？司長屈612揹數，終於撞板。
他的「鄰居老公」剛好也提出上訴，不服別墅被判僭建泳池，罰款，又的確多過七嚿水，盛惠二萬。上訴一方的律師指泳池只是由人手注水、圍板架起的一個大膠袋，非水泥結構，類似兒童嬉水池。嘩，14噸水的兒童嬉水池嗎？只供二人鴛鴦戲水嗎？冇掙扎，畫面會比大媽在馬鞍山溪水中裸浴香艷。少少煞風景的是，上訴疑點令人𢱑頭，點解老海鮮家裏會架起兒童池？將屋企變海鮮酒家，龍躉溝金魚嗎？品味呢家嘢屬高尚情操，深不可測。陽光下，別墅中，吹脹一池春水，有人真係好L鍾意游龍戲鳳，干卿膠事呢。慳返公帑，撤控啦！