前日重陽節元朗八鄉大江埔村發生山火，昨日凌晨時分更一度逼近一間動物收容中心，負責人於社交平台呼籲義工幫忙協助疏散中心內的毛孩，獲大批人士響應到場支援，藝人袁文傑、楊證樺與張明偉也有到場。袁文傑昨日回覆傳媒時，扯火怒轟粗心拜祭者：「點解多人拜山就會多山火吖？」楊證樺亦說：「大家好團結，為小生命付出一切。」
元朗八鄉大江埔村前晚火光熊熊，到昨凌晨零時許，山火逼近附近一個狗場，該狗場為動物慈善團體「大樹下善待動物庇護站」。據知場內約有150隻狗和30隻貓，負責人緊急疏散撤離，但因為毛小孩眾多，人手及撤離工具包括動物籠等嚴重不足，因而遇上困難。負責人昨日凌晨近1時，在網上作出呼籲，希望有義工到場支援，藝人袁文傑、楊證樺與張明偉響應到場協助。
袁文傑昨日回覆傳媒查詢時表示：「我唔係第一批到達嘅，同負責人溝通咗，就靜靜哋企喺一邊等候有經驗嘅義工，佢哋好有經驗，將啲狗狗抱咗入籠，我哋就鋪好毛巾遮住個籠，點好名跟住就負責搬佢哋落斜坡，等另一批義工車佢哋去安全地方。」袁文傑指救援有一定難度：「因為啲狗狗都重嘅，同埋始終都係斜坡、又有少少凹凸不平、又有少少濕，搬咗三、四次左右啦，叫做出一分力。」
講到重陽節發生山火時有所聞，袁文傑即時扯火：「真係想講粗口咁滯，每一年都係咁，拜完山之後稍為執拾一吓，其實咪應該唔會發生呢啲事？唔好同我講話意外，點解就係多人拜山就會多山火出現吖？人總係永遠重複犯緊同一種錯去毀滅自己。」
楊證樺昨日凌晨近3時抵達，他透露現場情況頗混亂，但大家齊心救流浪貓狗，場面相當感動，他說：「我第一時間睇吓火勢，真係好近，我去問現場消防師兄啲火點？佢話：『放心，我同你哋守喺呢條防線，唔會有事。』真係好正，大家好團結，一呼百應，為小生命付出一切。」由於現場風勢難以控制，火海一度吹向另一間動物收容中心，他說：「我同袁文傑原本想去另一邊幫手，但現場有義工叫我哋留守呢邊，我哋都係聽指示做，先將有病或好驚嘅貓狗搬去山腳底。但由於啲籠好重搬唔郁，要先將動物轉入飛機籠，但籠又唔夠，義工話要20個，半小時後，就有好多新舊嘅籠陸續運到。」
楊證樺近年經營寵物保健品牌，並發起名為「給浪浪一個活下去的機會」的醫療經費籌款活動，因而認識「大樹下」，他說：「知道佢哋缺乏資金，連獸醫治療動物費用都要賖數。真係希望社會會多啲關注浪浪（流浪動物）。」
在無綫處境劇《愛．回家》飾演「佐治」的張明偉昨日凌晨也有到狗場幫忙，他在Ig撰寫長文：「大家雖然互不相識，但都合作得好有條理。見到大家嘅熱心，都真係幾感動！」他又留言指無心之失可能要付出好大代價：「希望大家上山（唔只拜山）真係要特別小心，做個負責任嘅人，記住記住記住要整熄火種。」
狗場義工陳小姐昨日回覆《蘋果》表示，非常感激袁文傑、楊證樺和張明偉幫忙，大讚三位演員全無架子，她說：「我只係fb作出呼籲，冇諗過佢哋會嚟，袁文傑同楊證樺係全場最高大嗰兩位，後來聽返義工講，佢哋真係叫乜都做，好幫手，真係一方有難，八方支援，好感動。」她透露昨早9時，火舌熄滅後，所有貓狗已返回收容所。