韓職喺我神預測之下，已經知道晒爭標同護級形勢，吹晒大雞叫大家買全北汽車。呢隊班霸冇令我失望，擊敗蔚山現代手執半隻盃耳，護級就繼續亂局，要鬥到最後一周，增添刺激性。周中決定回歸番日職嘅懷抱，星期三有兩場推介俾大家，一場FC東京主場對柏雷素爾，另一場就係橫濱水手作客廣島三箭。
其實呢兩場都關係到亞冠盃參賽席位，首先講FC東京，上一場喺主場情況下輸0:4畀水手，跌到第四位，當然過程中FC東京有球員攞紅牌，係大敗嘅轉捩點。不過睇番東京全場不斷採取主動進攻，只係把握力欠奉。嚟緊星期三對住柏雷素爾，對手更加係直接唔防守，以快打快鬥攻，「入球大細」中位數[2.5/3球]都唔驚，從陰謀論睇近期日本波勝負好難估計，所以捧「大」就冇走雞。
至於第七位嘅橫濱水手，仍然有望爭亞冠盃位，喺近兩場比賽有好明顯嘅態度轉變，中前場壓逼比之前更積極。但係呢兩場波用高速兼全場壓逼下，連贏兩支幾強嘅對手，今場我估計體能上必須有調整。而廣島主場對較強對手，往往以慢打快，頻率較慢，防守為主下，唔睇好雙方加埋有三個入球或以上，所以偏向要個「細」，仲有唔信水手連續三場踢出好波，隨時一個回馬槍就輸番畀你睇，死未！
文：黃耀富
截稿前馬會尚未開盤，盤口僅供參考，讀者記得留意足智彩網頁。