早排西九龍中心外牆掛咗六幅知名漫畫插畫家林祥焜畫嘅美少女漫畫廣告，結果引嚟車淑梅、深水埗民建聯區議員劉佩玉呢班衞道之士投訴，話啲漫畫好暴露、意識不良，劉佩玉仲請願要西九龍中心撤走少女漫畫廣告。
早排因颱風關係六幅廣告被拆走，前晚就掛上新一批漫畫，今次真係充滿驚喜，美少女竟然換上香港無厘頭漫畫元老、甘小文老師嘅肥婆四同哨牙珍，立即引起網民騷動。
外號甘員外嘅甘小文，早排響應林祥焜捍衞創作自由號召，將林祥焜畫嘅美少女漫畫廣告二創，畫咗肥婆四同哨牙珍版「美少女」，林祥焜決定將呢啲二創畫變成「林祥焜X西九龍中心BILLBOARD」計劃一部份，前晚先出甘小文系列，小文老師仲畫多幅以林祥焜為藍本嘅「美少女」湊夠三幅廣告。林祥焜喺facebook預告驚喜陸續有來，「睇吓邊個最不雅，邊個嚇到最多人一跳！」
肥婆四同哨牙珍一出，立即引嚟大批網民去西九龍中心影相打卡，有網民發現，肥婆四同哨牙珍同抗議美少女漫畫廣告嘅劉佩玉，仲有佢嘅社區幹事陳穎欣有九成相似，仲整埋惡搞圖。劉佩玉回應呢件事，就話上次係收到家長投訴，佢以區議員身份反映意見，又唔肯再評論今次小文老師漫畫風格，話佢嘅意見唔重要喎！至於畀網民惡搞佢似肥婆四，劉佩玉話唔會因為咁而唔開心，會坦然面對。
李八方