正所謂無官一身輕，財經事務及庫務局前局長馬時亨噚日接受民主黨前主席劉慧卿網台節目訪問，講到做官時佢話「今時唔同往日」，𠵱家啲官成日俾人鬧，「個心都唔會好舒服」，仲踢爆好多官連AM車牌（政府車牌）都唔敢用，以免咁易喺街俾人認出，「佢哋（官員）換咗車牌嘞，總之唔係用AM」。
被問到點睇特首林鄭月娥突然押後宣讀《施政報告》？肥馬就話林鄭今次改動咁倉促「比較出奇」，因為《施政報告》至少要幾個月準備，坦言睇新聞時都覺得「點解會咁嘅？」佢分析林鄭咁搞法會有代價，就係令巿民期望更高，若然最後《施政報告》冇料到，巿民批評聲音只會更大。
佢喺節目中又話，噚日有人向佢「報夢」，話香港若要走出當前政治困局，政治生態必須重大改革，就係需要一個新政黨，組織同吸納退休官員及現時喺政府委員會入面嘅精英參選立法會，「咁樣可能令香港喺政治方面有啲新面貌」。
咁特首人選換馬，會唔會令香港更快有新氣象？佢就話現時啲馬都未入閘，所以佢未落到飛，加上有時啲馬即使熱咗身，最終都未必入閘，所以佢要等啲馬入咗閘後先討論呢個問題喎。
李八方