周中就不過不失啦，推介兩場日乙一贏一走，希望幫到大家。
今個周末就由日本飛到去南韓，韓職已經去到尾聲，雖然仲有兩周賽事，但今周就有對冠軍有決定性嘅大戰，全北汽車（圖）作客蔚山現代。上星期同大家講嘅韓職陰謀論，係我嘅神算下果然出現，就因為蔚山現代作客慘敗畀浦項制鐵，三分盡失下，榜首分數優勢亦冇埋。再加上蔚山上場有兩名外援紅牌，今場停賽，後防又俾浦項轟炸到體無完膚，今場睇怕都未回到氣，相反全北季初表現不濟嘅外援已經清除咗，換嚟識入波嘅巴西前鋒古斯達禾軒歷基，雖然同分不過因得球較差，全北要贏先可以過頭，今場刀刀叉叉杯杯碟碟都應該會攞晒出嚟，亞洲盤仲要平手盤，你話鬼鬼哋都好，我就對全北信心十足，蔚山今季兩次對全北都未贏過，大力大力推落全北度啦！
護級組都好玩，榜尾兩隊FC城南同仁川聯上周都輸，睇番護級區分數，仁川聯落後城南一分，如果周六搶到分，起碼最後一周韓職都叫有嘢睇，唔係變晒例行公事搵鬼睇。周六仁川聯主場對釜山偶像，主隊狀態好啲，不過釜山避免捲入降班威脅，今場都唔會完全放軟手腳，亞洲盤開平手，冇咩高低，反而預呢場波大家都有波入，可以試一試入球「大」。
文：黃耀富
截稿前馬會尚未開盤，盤口僅供參考，讀者記得留意足智彩網頁。