香港與新加坡搞旅遊氣泡，似乎好事近，話原則上大家達成協議，要花幾個星期安排具體細節喎。大原則不外乎要乘客上機前，有陰性檢測證明，到埗後又再檢測一次，然後免去14天隔離檢疫，對商務旅遊最方便，而乘坐嘅飛機不接轉機客，係氣泡專機。
馬主N 97前已未雨綢繆，攞咗新加坡居留權，二十三年來不斷來往新加坡，一年起碼住三個幾月，馬季唞暑期間，更以新加坡為家，去年聖誕節在新加坡，新春返來之後，便因疫情關係，未有去過。呢日在馬會飲茶，見到佢兩公婆如常撐枱腳，於是講一聲：「你又可以去新加坡嘞，等多兩三個星期啦。」點知馬主N話：「咪制嘞，一來一回要檢測四次，額外花多四千蚊檢測費，唔化算，兼且一個唔好彩，在新加坡畀人傳染到嘅話，入院醫藥費貴過香港好多，未搞我！」咦，咁除咗必需之商務旅遊外，仲有乜人會去？國泰隻股票已經炒起，會唔會係虛火？早一日旅遊Y已經同左丁山講過，短期內搞唔到旅行團去新加坡，因彼邦地方細，冇乜旅遊景點，同香港差唔多，香港人去新加坡旅遊，絕大部份係自由行，比較少加入旅行團嘅，所以開放港星旅遊氣泡，對旅行社生意冇乜幫助，但當然係有好過冇。
旅遊Y最想有「台灣氣泡」，點解邱騰華局長唔搞呢？旅遊Y係藍絲一族，佢瞪大隻眼講：「為了眾所周知嘅理由吖嘛。」騎騎，特區政府冇北京點頭，點敢同台灣傾旅遊氣泡吖，雖則台灣疫情受控，情況比新加坡好好多。
港人冇得去旅遊，連香港空中遊一個半小時都殺，機票迅速售罄，令左丁山大跌眼鏡。究竟飛機在香港上空飛有乜好玩？睇風景不如坐直升機環港遊半小時。環保K就媽媽聲，認為飛機在香港上空飛行個半小時，大量增加碳排放，對香港冇好處。唉吔，航空公司冇生意好做，挖空心思辦本港空中遊，趁住本港上空航機交通量大跌冇乜所謂啦。環保K還是憤怒不已，大罵航空公司唔講CSR。
曾智華唔知從那裏攞到圖片，在fb上載一份國泰航空公司報紙廣告（睇樣應該係1950年代至1960年代初），舉辦「星期日天空遊覽飛行」，上午十一時起每半小時起飛一次，票價每位20元，兒童同價，環繞港島，鳥瞰港九！估唔到六十幾年後又有此舉，果然係太陽之下無新事也！