唔通男人真係天性鍾意偷食？才華洋溢嘅「圓碌碌」上年先結婚，娶咗一個門當戶對嘅老婆，兩人喺外國舉行浪漫婚禮，仲請到天王巨星出席。點知新婚唔夠一年，聽聞圓碌碌原來婚前已收埋地下情人，佢哋秘密拍拖八年，由於女友喺外國讀書，所以一直冇人知。
聽講圓碌碌唔係第一次偷食，早幾年先後搭上內地女星「仙子」、奀茄歌星「雀仔」，三番兩次搞曖昧俾女友識穿，當時圓碌碌就向女友認錯，講盡甜言蜜語，結果箍煲成功。
點知圓碌碌死性不改，之後又衰偷食，最後仲娶埋新歡，唔甘心被飛嘅女友梗係怒火中燒啦！佢唔只好嬲圓碌碌浪費咗自己八年青春，當日仲因為圓碌碌嘅身份，聽佢媽咪話低調，自己先會咁聽話做地下情人，雙方仲見埋家長，以為遲早會有一日嫁畀佢，點知入門夢碎。聽聞前女友想向傳媒爆大鑊，透過第三方搵返幾百萬人仔做報酬，不過呢單料最後冇爆出嚟，唔知係咪圓碌碌出錢擺平咗呢？
撰文：Jessie
本欄逢周三刊出
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。