【名家足路】
【對決場次︰國際米蘭vsＡＣ米蘭】
上周揀咗葡萄牙對法國受讓下盤，雖然贏得半格，但總算打破近期頹勢開齋。今周《一燈決》再接再厲，揀咗場米蘭打吡同王杰拗手瓜，小弟睇好有伊巴謙莫域確診好番嘅米蘭，作客頂得住國際強攻。
米蘭同國際都受到武肺影響，多名球員冇得踢，不過據意大利傳媒報道，米蘭星期二已經復操，仲話確診後好番嘅伊巴謙莫域會喺米蘭打吡正選上陣，不過佢嘅前鋒拍檔列比錫啱啱代表克羅地亞踢國際賽受傷，今場肯定踢唔到，另外中堅梅沙基奧同右閘安德列干迪倦勤，好在後防主將阿利斯奧羅馬洛尼傷癒復出，配合大勇嘅門將基安盧基當拿隆馬，相信米蘭可以延續今季聯賽不失球走勢。國際上輪聯賽俾拉素逼和，今季第一次失分之餘，中場史提芬奴辛斯紅牌被逐，今周對米蘭要停賽。最大鑊係國際陣中有多位主力中咗武肺，右翼衞艾舒利楊格、中場加利亞甸尼、尼恩高蘭、中堅史堅尼亞同巴斯東尼全部唔出得，當中四人屬主力，雖然球隊板凳夠深，但點都會影響教練干地嘅部署。
米蘭對上兩個球季喺聯賽被國際雙殺，往績上好似輸蝕咁，不過只從受疫情停擺後六月復賽開始，米蘭聯賽取得12勝3和不敗走勢，包括新球季三連勝，氣勢絕對唔差過國際，難怪連名宿卡卡最近受訪時，都話今季米蘭以老帶新，似足當年佢初到米蘭時一樣，相信呢隊米蘭會越打越好，又睇吓卡卡有冇老點小弟？
文︰筋肉人
《一燈決》係今季新欄目，由上月擂台盟主同上月燈神拗吓頸，睇吓讀者信邊個。