習近平噚日上晝喺深圳慶祝經濟特區建立40周年大會上開金口「宣讀聖旨」，發表所謂重要講話，佢「龍體」違和咳聲連連成為台上焦點，與此同時台下另有一番風景，只見明明成場講話習大大全力將香港矮化，將香港對深圳發展貢獻隻字不提，但無阻一眾特區官員把握顯示忠誠嘅黃金機會，財政司長陳茂波、律政司長鄭若驊、保安局長李家超、政制及內地事務局長曾國衞、創新及科技局長薛永恒同特首辦主任陳國基，個個小學雞上身，猛咁低頭抄筆記，可謂出盡力擦習總嘅鞋。八方望住呢個不斷寫寫寫情境，仲擔心佢哋驚抄漏咗會被罰，又或者驚俾人突擊抽問答唔出要孭鑊囉。
國家領袖一講嘢，下面官員密密抄，外國早有範例，例如北韓領袖金正恩每次外出視察，隨行人員總係手持筆記，當金正恩一開聲講嘢，有人就自動波快速筆錄，有專家甚至研究過呢個現象，正面係金氏用嚟塑造親民形象，負面就係官員如果記錯內容隨時冇命，咁係咪要落力記低內容先？
唔少網民噚日見到呢幕之後，有好多高汁意見，例如認為佢哋唔用毛筆墨硯，擺明公然踩踏中國文化；有人就話「講到幾咁高科技，仲要用手寫筆記」，又係喎，除咗明明可以錄音，其實官媒黨媒仲會一字不漏將習大大說話原汁原味記錄發稿，八方見中午未到，發言全文已喺網上流傳；亦有網民分享高見，解構班港官呢個行為，懷疑因為習大大講嘢太悶，大家唔搵嘢做提神，隨時會打呵欠遊魂瞌眼瞓。但當然最實際作用，應該係可以顯示自己高度重視習大大聖旨，令自己嘅一片勁共丹心，可以喺央視直播鏡頭之下顯露無遺。
李八方