慘慘慘！葡萄牙足總周二證實，祖雲達斯前鋒基斯坦奴朗拿度（C朗）確診感染武漢肺炎。
英國《每日郵報》報道，啱啱喺歐國聯分組賽，代表葡萄牙賽和法國0:0嘅C朗，喺周一接受病毒檢測，結果證實佢對武漢肺炎呈陽性反應。葡萄牙會喺周三出戰瑞典，但C朗已經退隊。
葡萄牙足總聲明話：「基斯坦奴朗拿度感染咗武漢肺炎，佢冇病徵，家陣已安排佢接受隔離，其他球員都即時接受病毒檢測，全部都呈陰性反應，球隊周二下晝已經恢復訓練。」
C朗喺對上兩場葡萄牙嘅國家隊賽事都有踢，包括上周0:0賽和西班牙場國際友誼賽。C朗喺周日嘅歐國聯A3組賽事，亦有代表葡萄牙作客出戰法國，佢仲喺補時有一次射門被救出，兩隊最終踢成0:0平手。C朗喺完場後，曾同早排都感染武漢肺炎嘅法國球星基利安麥巴比搭膊頭影相，亦有出席葡萄牙大軍嘅多人聚餐。法國周三會轉戰瑞典，但葡軍就表明呢位35歲前鋒唔會上陣。
C朗喺今年3月，意甲因為武肺疫情停擺後，就同家人一齊返咗葡萄牙家鄉避疫，直至球季5月重開前先返意大利。C朗嘅祖雲達斯隊友保羅戴巴拿、魯加尼，仲有已經轉會國際邁阿密嘅法國中場馬度迪，早前都曾經中招。
另外，羅馬傳奇球員托迪17年職業生涯為羅馬上陣過785場比賽，射入307球同貢獻183次助攻，仲喺2001年幫球隊攞咗意甲錦標。佢嘅爸爸安素托迪雖然唔係足球員，但幾乎每次當「王子」要作客比賽嘅時候，都會跟隨大軍幫佢同羅馬打氣。可惜羅馬喺星期一證實，呢位廿四孝老竇因為感染武漢肺炎後不治，享年76歲。事實上安素托迪幾年前患上心臟病，本身已屬武肺嘅高危一族，今次懷疑係因為出現嚴重併發症而不治。