之鋒前幾日先分享完佢大學畢業，原來噚日又到佢24歲生日！適逢噚日掛起八號風球，之鋒嘅朋友就用氣象圖改圖，將「浪卡」改成「黃之風」，祝佢生日快樂咁話。
之鋒朋友發文就話，「之鋒一出手，便知有沒有」，用佢生日正日整返個有史以來距離香港最遠嘅八號波，變相搞咗個半日三罷……計八方話呢，唔止係三罷，直情係令到大半香港停工停學，賀佢生日㖭呀。所以呢位朋友都話呢個「黃之風」輕鬆勾結外國暖流，乜風都未有就八號，果然有啲料到。
不知不覺踏入24歲，雖然唔少朋友同網民都祝佢生日快樂，不過之鋒自己就似乎冇乜休息嘞。睇返佢facebook專頁帖文，發現之鋒喺踏入生日之前三分鐘，仲分享緊有關12港人送中嘅新聞，噚日生日正日都仲踢爆鹽田看守所執法人員名單。至於之鋒自己又有乜生日願望呢？佢就同八方講：「國安法通過前，曾擔心未能在四面圍牆外度過24歲生日，所以當時其實曾經提早切蛋糕『慶祝』。對比起6月的最壞預想，生日正日能在八號風球裏，平安於家裏度過一整天，說實話已屬萬幸，得來不易。生日不敢奢望甚麼，僅希望來年仍可以跟親人平安度過，還有寄盼十二手足早日歸來，身陷囹圄的義士恢復自由。」
李八方