談起珠寶設計師，或許會想起打金鑄銀的工匠，設計上會講究名貴的鑽石和寶石，加上難度極高的手工藝，絕對可稱為藝術創作，這個行業個個都是老師傅，但亦有新一代年輕設計師以全新角度出發，在承傳傳統手藝的同時，亦利用新思維、新物料去開拓更多的可能性。香港設計師Vann Kwok由時裝設計轉型到首飾設計，在她眼中，珠寶首飾是傳統，也是一個全新的空間，讓她在對比、對立、反差與矛盾中不停思考，不停創作的地方，為香港珠寶首飾界繼後香燈。
撰文：楊慧珊
「做乜都好，𠱁自己開心係最基本吧！」Vann Kwok在理工大學畢業後，就從事時裝設計師的工作，2012年離開香港走到英國倫敦，「喺香港嗰段日子做得最多係演唱會嘅舞台服，發覺好多想要嘅效果已經唔能夠只用布可以做成，而係要搵其他物料同技術，久而久之產生咗想去學一啲新嘢嘅念頭，於是去咗倫敦再進修。」
Vann在London College of Fashion修讀Fashion Artefact，並非單純的珠寶設計，「其實係關於時裝、藝術同工藝嘅課程，好似好虛無嘅學科，但好多好有趣嘅全手藝知識，倒模、鍍銀，仲有首次接觸金工，另外又有時裝、身體、空間、藝術之間關係嘅學術研究，探討點樣突破之間嘅界限，當時大部份學生都係做一啲所謂accessory嘅嘢，我畢業作係body sculpture。之後參加咗兩個大型比賽，大會認為我嘅設計屬於contemporary jewelry。」從此她進入了首飾設計的蟲洞。
Vann的珠寶體積比較大而且空心，流動性的形狀是賣點，會有如溶解的心形、細胞分裂等各種奇形怪狀，「我係一個唔能夠畫直線嘅人，當年上堂要跟住直線𠝹皮，要斟酌於毫釐，要追求呢種不合人性嘅事情，對我嚟講好痛苦。」
Vann自言不能依guideline 工作，以致其珠寶的設計形態有一部份都是自然生成，「我會放手畀material以自己去form一啲形態出嚟，呢啲by chance嘅嘢，capture當時一刻嘅狀態，令珠寶首飾加入了時間嘅元素。」
利用既定與隨機形成自己的獨有風格，對Vann而言，設計是𠱁自己開心，「首先要自己have fun，我好鍾意超現實主義，會研究佢背後嘅種種，但又會去欣賞BLACK PINK、Kim Kardashian以至美少女戰士，我相信任何嘢都會有啲能觸發靈感嘅有趣成份。只要一直做落去，就會發現知音，會有人欣賞自己嘅作品，又或者我嘅作品可以啟發到其他人。」
2017年學成歸來，Vann接了一些project，例如跟Anais Mak設計Nike Air Force球鞋，順道摸索香港的首飾巿場和營商環境，「香港打金工匠好難搵，行頭細又正逐漸沒落，我攞住樣辦去敲門，佢哋睇到空心、銅同銀，起初都拒絕，話『我哋鑲石嘅，唔做空心首飾，銀同銅好cheap。』」對傳統珠寶首飾行業來說，Vann的設計談不上是首飾，老師傅不買賬，後來幾經游說，最終願意一試，「佢哋半年來一直拒絕我，後來都應承試一試，有啲叔叔見到製成品出現喺雜誌上，都非常有滿足感。」
Vann非常珍惜傳統手工藝，「作為一個香港設計師，其實我哋喺外面嘅聲音好細，既然我哋有咁犀利嘅手工藝，就盡量做啲嘢去保存，我希望能夠以呢啲傳統工藝去做我嶄新嘅設計，為佢哋帶來一啲衝擊，能繼續生存。」
經過兩年的巿場探索，Vann在去年成立同名品牌，「去年有社會運動，然後再有武肺，對品牌其實冇乜打擊，始終我只係新品牌，況且戴口罩出街嘅日子，打扮時總需要首飾點綴。」但這樣卻加速了品牌發展網上渠道的速度，「對講求觸感嘅首飾品牌嚟講係迫於無奈，只可以靠更多嘅文字資訊同360度圖片填補不足，下季宣傳也打算全數碼化，用avator代替model。」
更多精采時尚內容，盡在http://add.appledaily.com。