「如果唔係東奧延期，家陣應該拎住奧運獎牌度緊蜜月。」做奧運夢的人多的是，但他敢做奧運獎牌夢，10年前奪廣州亞運花劍個人賽銀牌的張小倫，等這張東京奧運入場券足足10年，由以前廿多歲到現在35歲人夫，儲夠實力衝牌，懶理世紀疫情，天天努力操「弗」自己去迎接個人第一個奧運會。
記者：徐嘉華
攝影：董立華
場地：劍舍 部份圖片由受訪者提供
訪問在男花「大師兄」張小倫有份入股的「劍舍」進行，第三波疫情期間，他大部份時間在這訓練，手持東奧團體及個人賽兩張入場券，是港隊中最年長的，小記一見到他就忍不住問，「如果東京奧運真係搞唔成……」，問題還未說完，小倫已說：「我死心，徹底咁死心，如果呢種事要發生喺我身上，都冇計，好似拍戲咁。」
擁有1米88「男一」骨架及樣貌的小倫，劍擊路迂迴曲折、高低起伏，可以拍電影，不過，推過不少模特兒工作的他，不愛走天橋、不愛水銀燈，只愛刀光劍影，劍擊場上的劍道才是他最愛的舞台。
上一次跟小倫詳談，已是2010年廣州亞運，他帶着1銀1銅回香港，是香港男花第一人，當時他在亞運四強，爆冷以一分之微擊敗主場且大名鼎鼎的世界冠軍雷聲，吸引近200個場內義工排隊要他簽名，他也說：「呢次真係有做明星嘅感覺，決賽對南韓嘅崔秉哲，雖然最後輸一分，但全場嘅中國觀眾都同我打氣，真係好難忘。」
說時眉飛色舞，定下神來，小倫說：「咁就10年！」
眼前的張小倫像吃了防腐劑，跟10年前沒兩樣，換上數月未穿過的劍擊服時他忍不住說：「你睇吓，褲頭鬆咗幾多！」換衣服時不經意露出肚皮，若隱若現的腹肌令他十分自豪，體形比2010年還要「弗」，今年3月中從美國返港後，體院因疫情嚴峻多次實施「封院令」，小倫大部份時間到「劍舍」訓練，沒想過效果比預期好。
他說：「東奧因疫情延期一年，對年紀大啲嘅我當然有影響，要重新調整狀態冇後生選手咁易，不過我勝在技術同經驗都有齊，只要我keep到體能，影響就唔會太大；最開心係呢幾個月練到腹肌，我由細到大都冇腹肌，小肚腩就一直都有。」3月從美國返港時，曾重至88公斤，近期回落到新低的80公斤，加上小肚腩終於消失，小倫也沾沾自喜。
小倫16歲才學劍，20歲開始當全職運動員，這15年在劍擊路上經歷如過山車的高高低低，3試奧運（包括2008北京奧運、2012倫敦奧運及2016里約奧運）都失望而回，他直言最崩潰一次是2012倫敦奧運：「2010廣州亞運成績真係好好，狀態一直都好『弗』，2012年係我最有信心衝奧嘅一次，點知打完頭兩站倫奧計分賽，去到俄羅斯站，我打完比賽，成個人企唔到起身，即刻飛返香港，10幾個鐘機，我成程瞓喺四人位，返到香港照MRI先知腰椎間盤突出，連去爭倫奧資格都無能為力喇。」雖然最後決定不做手術，用了半年時間嘗試各色各樣的物理治療，終於不藥而癒，但去不到倫奧這打擊仍在，小倫為了麻醉自己，跟做廚師的弟弟在大圍開烤魚店，高峯期曾在港、九、新界有四間店，去年全部高價易手，賺錢離場。
這10年，小倫想過無數次在劍壇離場，2014年仁川亞運得團體銅牌後，他想專心留在烤魚店，多得男花教練汪昌永挽留他，2018年戲劇性失落亞運參賽資格，一肚冤屈的他在同年亞錦賽奪個人賽金牌後，想急流湧退，亦計劃到中國開餐廳，剛好法籍教練Greg到港任教，令小倫改變想法：「我打咗十幾年劍，未試過跟外國教練訓練，都想試吓嘅，點知一跟就出事，第1站東奧計分（2019年5月）就贏團體亞軍（見另文），跟住就停唔到。」
以為一切走入直路，最難取得的東奧團體資格也到手，還附帶三個個人賽席位，香港男花隊在五站奧運計分的世界盃，3站打入4強，去年第一站聖彼得堡及今年最後一站開羅，分奪1銀1銅，在比賽中曾擊退多支強隊如世界第2的法國、第3的意大利及第4的俄羅斯，大家一心為今年7月奧運團體衝獎牌去預備，但劇情怎會如此正路？
小倫苦笑說：「講真，我家陣仲係好忐忑，喺劍擊生涯就差踏上奧運舞台呢步，我同朋友講佢哋都覺得好笑，我等咗10年嘅奧運入場券到手喇，但都可以遇到世紀疫情，奧運延期一年，朋友都話我劍擊生涯夠精采、夠特別。」問他可真有想過站上奧運頒獎台，小倫想也不想：「當然有，我哋個勢一直升緊，打入奧運團體前四一定走唔甩，今次我哋唔係志在參與。」
由廿多歲等奧運資格等到35歲，連status也變了，小倫去年11月跟Natalie拉埋天窗，他感激太太的體諒及支持，由於婚期跟密集的東奧資格賽相距不遠，他婚禮前後只留港五天，說好的北歐蜜月，只能等到明年暑假東奧後才能成行。
四年前里約奧運閉幕禮，時任日本首相安倍晉三以「Super Mario」裝扮介紹東奧，早前安倍因病辭去首相職位，全球疫情仍未受控，不少人對明年東奧能否舉行抱很大問號，等了10年的張小倫就持樂觀態度：「最多咪閉門，對我嚟講梗係可惜，我係嗰種越多觀眾就打得越起勁嘅人，難得上到奧運舞台可以表演自己身手，如果冇觀眾，都幾可惜。」