噚日8號波打工仔都多咗日假，唔知大家碌手機時，覺唔覺有個人老是常出現？八方講緊警隊頭目鄧炳強。微博流傳一張疑似喺警總拍攝嘅相，上載者就話，「今天香港在打颱風，一哥更在衝峰（鋒）車上當更」，民建聯陳克勤亦有貼呢張相，言之鑿鑿話一哥坐上衝鋒車當「颱風更」。
單睇張相只係見到九個popo圍住一架衝鋒車，不明所以。好多人都笑颱風「浪卡」弱雞，PK即使真係出更，都認真識揀，無風無浪嘅環境先走在最前線呃like，咁樣做警察，唔知係成龍邊套電影學返嚟呢？正當八方煩惱答案時，微博留言似乎解答咗，「幹部學院深造過，實地運用好捧（棒）！」警察公共關係科回覆話，一哥噚日同衝鋒隊人員到港島區巡邏咗一啲受颱風影響較大嘅地區，包括杏花邨及大潭道，同唔同單位嘅前線同事交流，了解佢哋喺不穩定天氣下執勤嘅情況。
講開PK鄧，官方喉舌中新社噚日播咗佢個訪問，內容都係替警隊洗白同抹黑示威者。中大畢業嘅PK鄧，話早排聽中大學生會迎新詞以「暴大人」自詡，心中五味雜陳，又聲稱年輕人敵視國家係源於誤解，叫佢哋唔好單憑報道去認識國家。PK鄧又為自己人洗白，用「世界一流」讚popo，話同袍係「暴亂」中克盡己任、盡忠職守，又話「8.31太子站打死人」及「新屋嶺性侵」係不實指控和抹黑，但PK鄧又唔講吓點解「7.21唔見人」？
訪問仲有PK鄧chok眼淚一幕，佢話舊年「一段長時間冇返屋企」，有日太太拎咗湯同衫去警局搵佢，令佢好感動咁話。喺電影《開心鬼》做過「茄喱啡」嘅PK鄧，唔知係演技差定劇本需要嘞，最後chok唔出眼淚只係兩眼紅紅。
李八方