香港祖雲達斯球迷會星期二晚喺facebook宣佈，來季被暫停官方球迷會資格。事緣球迷會舊年多次就反送中運動發表聲明、帖文同聯署，強國十幾間玻璃心嘅「尤文圖斯」球迷會集體舉報。之後祖記向香港球迷會發警告，要求刪po。直到今年，球迷會想為隊中傳奇門將保方喺香港舉行致敬展覽，曾經向祖雲達斯香港辦事處反映，希望有財政協助，但始終都冇回應。
帖文又透露，之前唔少球迷反映球迷會福利不似預期：「多次同祖雲反映過，請求提供一啲香港本土優惠，換嚟嘅失望係一年比一年差嘅禮物：上年係超薄背包，今年更只得膠手帶一條。」
聲明中表示，過去六年多次反映會員福利問題，無奈回應都好冷淡，「我哋唔係為名利，但心血終有一日會流乾，一直消耗自己對祖雲嘅熱情去做呢件事，我哋比起任何人更清楚：人會攰㗎。」球迷會又引用14年前「電話門事件」，指只要涉及人，政治就如影隨形，強調香港球迷會嘅核心係香港人，冇可能對香港社會問題坐視不理。球迷會指未來將會以「香港祖雲達斯球迷會 Juventus Officious Fan Club Hong Kong (JOFCHK)」名義繼續營運，仲話雖然未知冇咗官方認證有咩影響，「但只要有大家相伴，冇咩係唔可以面對。」