陪肥仔K帶女兒去中環史丹利街「迦南」配眼鏡，呢間迦南就在陸羽前兩個舖位，每次去陸羽都經過，於是左丁山配眼鏡就幫襯呢間創始於1903年嘅眼鏡店，在史丹利街地址已經營74年。
途中經過中建大廈，畀人在後叫住，原來係P公子，P公子好奇問吓：「配眼鏡呀？係唔係上堂用Zoom？我見不少朋友兒女都係Zoom完又Zoom，Zoom親雙眼，最近要睇眼科醫生噃。」正因用Zoom上堂，小孩對住電腦對好耐，想唔近視都幾難。但肥仔K個女N，今年6歲，剛升上小一，並非因為Zoom而有近視，而係上堂發現佢睇唔清楚電腦上嘅細字，反應遲鈍，肥仔K在家見到，覺得有異，於是同女兒做測試，發現佢真係睇唔清五呎外嘅字體，於是搵沙田市中心眼鏡舖視光師，點知沙田市中心眼鏡舖一係話唔做小童驗眼，一係有舖頭收五百元驗眼費，而且預約等幾日。左丁山知道，即刻叫佢出中環到迦南，即時驗，明碼實價收350元啫。一驗之下，小女孩有近二百度近視，嚇親，急忙又去旺角睇小童眼科專家，醫生確認近視，但建議小女N先滴眼藥水一星期，穩定近視度數，先至去配眼鏡。9月23日開學了，滴眼藥水一星期已過，9月15日急忙去迦南配眼鏡，趕及上課時間。
點解小女孩N有近視呢？嚴問之下，小女孩講佢幾個月來唔使返學，精力過盛，收埋幾本書在枕頭底，晚上全家熄燈睡覺，佢就用電筒睇書，睇得多就搞到近視，肥仔K為之暈咗一陣，回家大肆在小女孩睡房掃蕩，攞晒啲書出房！左丁山問小女孩睇乜書，佢話最近睇Bad Guys，阿媽買咗十本，佢已經睇完。左丁山未聽過，上網一查。原來係紐約時報暢銷書榜上雄踞60星期之兒童書，已售出一千萬本。哎吔，家長買書畀兒女睇，本是好事，但要嚴加教導正確讀書方法！肥仔K反而哈哈大笑：「我小學時一樣係在牀上讀三國演義，故此有近視！」未上學已有二百度，再用Zoom上堂，好可能會增加度數。因疫情而停課，用Zoom上堂，初步跡象顯示係效能差，學生不起勁，老師勞氣，長期如此，會構成教育大災難，香港教育水平一定大退步。就快恢復返學嘞，希望唔會好似美國咁，一復課就引爆大量確診！