【名家足路】
【對決場次︰富咸vs阿仙奴】
因為上個月擂台排包尾，搞到成為咗《蘋果波經》今季第一位燈神，其實本人向來做足資料搜集，好畀心機研究球賽㗎！只不過波係圓嘅，上個月衰在運氣唔好成為咗燈神，今季呢個新欄目《一燈決》，本人就會喺英超開鑼戰推介富咸（圖）下盤畀大家！
兵工廠表面風光有暗湧
爆樣嘢畀大家聽，其實名家守丹係阿仙奴球迷，我一早估到佢今場會撐兵工廠，但呢支球隊係咪咁睇好？我就有啲保留喇！冇錯，近一個月阿仙奴係拎咗兩個盃，表面上欣欣向榮，但內部仲有好多問題未解決喎！好似後防仲用緊唔知幾時會爆嘅「炸彈人」大衛雷斯同梅斯達菲，中場兩名麻煩友奧斯爾同古安杜斯又未賣得走。
事實上，阿仙奴上季聯賽排八，創咗近25年聯賽最差排名，仲畀宿敵熱刺騎㖭！而且佢哋盃賽贏曼城、車路士、利物浦等強隊，都係靠突擊贏波捧盃，今仗開鑼戰鬥決心防守嘅富咸，兵工廠又係咪可以撕破主隊嚴密防線，咁有把握大勝先？阿仙奴上季尾試過贏完利物浦，轉頭即刻輸畀阿士東維拉，今仗作客讓一球未必信得過喇！
事關富咸主場筆者就去過喇，座落喺泰晤士河旁邊屋仔細細，隨時浸得死兵工廠㗎，因為呢隊波實力唔太差，降班一年就彈返上英超，領隊柏加同陣中唔少球員都有英超經驗，大隻佬阿歷山大米祖域每季都有雙位數字入球，如果畀佢偷雞入到一粒，阿仙奴個上盤都咪話唔凍過水！
文：尊嘉
《一燈決》係今季新欄目，由上月擂台盟主同上月燈神拗吓頸，睇吓讀者信邊個。