繪畫60年代著名少女漫畫《13點》的作者李惠珍上月因病離世，將於本月29日於慈雲山聖文德堂舉行守靈彌撒，並安葬在跑馬地天主教墳場。由1966年開始到80年代，李惠珍筆下的13點角色曾是萬千少女的時裝流行指標，被稱為「香港少女漫畫始祖」當之無愧。
香港動漫畫聯會副會長Alan昨日接受《蘋果》電話訪問時說︰「今日接到佢家人通知珍姐走咗，家人希望我哋代通知聯會會員。」他表示自去年中珍姐已未有出席聯會活動︰「去年下半年已知道佢身體抱恙入院，之後因疫情關係少咗聯繫，珍姐絕對係殿堂級、數一數二漫畫家。」
本地時裝設計師鄧達智與李惠珍母女相識20載，《蘋果》昨日聯絡鄧達智，他訴說二人相識經過：「我識佢嗰時佢4、50歲，衣着都好摩登，性格好斯文樂天，唔似13點嘅性格，當時佢係同《老夫子》旗鼓相當。」他認為李惠珍是一個fashion sense好強的漫畫家：「佢係香港時裝界一個好重要嘅人物，當年外國時裝雜誌喺香港未普遍，佢呢本幾毫子嘅漫畫書係香港唔少人嘅時裝啟蒙，佢畫嘅公仔靚，有時裝觸覺，而故事人物有層次。我小學時候開始睇，肯定受到佢嘅漫畫啟蒙，令我對時裝畫圖有興趣。佢作品嘅時裝有夾雜歐洲同中國風，有唔少人拎住佢嘅漫畫去畀裁縫，佢讀美術出身，睇唔少外國時裝雜誌。作品𠵱家睇返都唔過時，佢絕對係獅子山下嘅傳奇人物。」
《13點》為原創作品，據知13點名字源於李媽媽常以「13點」稱呼年幼的李惠珍而來。漫畫中的13點經常以新裝示人，曾有統計指由第1期至第28期，出現逾1,728個時裝造型。李惠珍在學生時代曾為《兒童樂園》畫漫畫，1965年第一本漫畫作品《花花小姐》，後來覺得主角太成熟，改為創作《13點》。她與漫畫報紙負責人伍尚鈞婚後育有兩女，前年獲香港藝術中心頒發「藝術榮譽獎」。李惠珍女兒不願談母親生前病況及離世一事，昨婉拒訪問。