已移民到加拿大多年的雷有曜原來在去年11月理工大學變成反修例的戰場時，他跟太太剛好在香港，更在入住的油麻地某間酒店內目睹當晚彌敦道發生的一切，談起當晚年輕人被追捕的情況，依然歷歷在目。Albert憶述：「我哋望落去，抗爭者喺右邊，左邊一排防暴已經佈防，我哋睇咗一陣就聽到已經開始發催淚彈，跟住啲細路梗係走啦，有啲散咗去內街，即刻睇到右邊防暴包抄，我同太太當時嘅感受係好慘，我太太已經不停喊：『我哋需要聯絡加拿大呢邊有關人士，睇吓有乜嘢可以幫到。』」
Albert謂當刻與太太即時各自打電話回加拿大的牧師及不同組織，向他們說明香港的狀況，希望可伸出援手。Albert更聯絡領事館，但結果並非預期中的好：「當時係渥太華總部嘅領事，我哋解釋情況之後，佢就話：『咁你叫裏面嘅學生打過嚟。』咁即係點？我點會聯絡到裏面啲學生？其實即係話佢幫唔到你囉。我哋情緒已經好激動，之後仲cut我哋線。」
Albert又驚訝香港的年輕人在這場運動中分擔不同角色：「以前我哋嗰代嘅年輕人只掛住玩，我自己都係，完全唔會理社會嘅問題，冷感得好緊要，但自從呢場運動開始到𠵱家，我就發覺點解𠵱家啲年輕人可以做啲『咁嘅嘢』？」他又大讚現在的年輕人很有創意：「有啲人寫出嚟我覺得好好嘅係『明知道徒勞無功，但係唔會無動於衷。』我覺得大家都知道做完又點？只不過大家盡咗一分力，做得幾多得幾多，好過你蹺埋手喺一邊『你哋去啦，我就唔會同你哋同路，你哋成功咗，我都OK㗎，冇所謂！』」