《蘋果日報》自從俾武裝部隊踩入編採部打壓搜查後，唔少香港人更加明白新聞同言論自由之可貴，連日來齊齊集資出錢喺本報登廣告，既撐《蘋果》兼要向政權表態，同時又令到一把聲音消失咗，佢就係政治閒人、前特首梁振英。作為《蘋果》最忠實讀者，689慣晒每日用8秒睇《蘋果》然後數有幾多版廣告，但唔知係咪呢排廣告太多數唔切，搞到佢連生活習慣都改變埋，自此冇再每日數《蘋果》廣告，直至佢噚日出山「重操故業」，點知頭炮即出事俾網民恥笑。
689噚日重出江湖，喺朝早9點01分就喺fb度出帖，話《蘋果》「回復常態」，咁咩係《蘋果》常態呢？原來就係「沒有任何全版廣告」！咦，照咁睇，689原來喺失職期間，係有繼續日日睇《蘋果》，只不過係報憂不報喜，唔講《蘋果》全版廣告成績啫！之不過，689唔知係咪太耐冇做好「廣告專員」工作，報紙A7頁明明有全版黃到金嘅廣告，由「一群婚禮界同路人」刊登，表明撐「言論自由」，但689就直接無視囉！有網民恥笑佢唔知係咪只掛住驗毒所以冇去驗眼，又有人話689係咪好似啲長者咁，俾騙徒呃，買咗份假蘋果呢？