特區政府勞民傷財搞全民檢測，但市民畀支拭子拮完個鼻其實都係得個吉，搞到呢場驗毒計劃越來越似對政府嘅不信任公投，於是建制派同藍絲自然要出盡奶力谷人數，同示範自己有瞓身參加呀，好似梁粉作家屈穎妍，就喺fb大興問罪之師，話佢俾人盜用咗個人資料去報名檢測，搞到佢冇得預約，仲話自己會去報警，叫人「洗定籮柚」。不過，有網民睇完佢嘅說法紛紛質疑，點解佢嘅個人資料咁易俾人拎到？而且以屈婦人嘅「江湖地位」，有心要驗又點會冇得驗？
八方先再三提醒大家，真係唔好亂用他人資料，以免俾PoPo告不誠實取用電腦！但又話分兩頭說，一班網民睇到屈婦人「訴苦」之後，就化身成為福爾摩斯，拆解當中疑點。最令網民諗唔明嘅係，預約要有身份證號碼，如果屈婦人話登記唔到，即係有人拎咗佢真正身份證號碼去登記，咁係邊個有屈穎妍咁私人嘅資料先？
有網民就風趣咁估：「佢老公幫佢報名，諗住畀個surprise佢啫」，但事實係咪咁，八方當然唔知啦！亦有網民揶揄，既然佢本身都想去驗，有人預約咗咪仲好，佢問返約咗去邊到做檢測，直接去咪得囉！唔明點解佢「多謝都無句仲要告人？」
仲有網民話，之前有幾千個一般市民冇預約都可以即場做檢測，以屈穎妍喺建制中嘅知名度，冇人會認錯或唔認得佢，有心做求其行入一間檢測中心，相信工作人員見佢大駕光臨，開心都嚟唔切，實畀佢即場驗，所以真係想驗唔需要講咁多；有人再一針見血指出，屈穎妍家陣呢個公告天下，其實咪話緊畀大家知，原來政府數字係有水份囉！
李八方