林作前日在社交網借電影《黑豹》（Black Panther）男主角查特域克保斯曼（Chadwick Boseman）的死訊抽水，他留言：「45歲就大腸癌過身。疾病無從預測，一定要早啲check，check之前，記得搵#林作保險。」惹來網民負評，指他「人做保險你做保險做到你咁無品」，又指他連查特域克終年43歲資料都寫錯。其後杜汶澤的《喱騷》出文揶揄林作的營銷手法是「黑sell」，才子王貽興前日在網上有發文悼念查特域克，晚上更忍不住撰文狂轟。
王貽興寫道：「病毒行銷都應該有底線，底線就係對於逝者嘅尊重，有啲水唔應該抽，有啲唔適當嘅說話唔應該講，講少句唔使死。」他又指：「係咪真係咁撈唔掂呀？令壽堂俾你丟晒架。」最後更hashtag了一堆文字：「想當年我搞劇你仲係咁煩住我個製片要求𢱑撈」、「我人生唯一做過最無悔嘅決定就係同製片講死都唔好畀呢啲為博出位乜都做得出嘅人出現響我嘅作品裏面」及「作為某某前男友已經係你一世成就」、「聽聞令壽堂當年仲要問財仔加按你哋層豪宅借錢畀你繼續揮霍媾女」等。
林作母親Lily被拉下水，她昨日短訊回覆《蘋果》時力撐兒子：「王貽興係邊個？我唔識，我都當佢的話廢。」林作之後再發文反擊：「我阿媽打嚟，認真問句『佢乜水？』lol enough said. 拍乜劇寫乜文，效果都係一般，絕對唔係個成功人。靠抽水同我一般見識就真係前輩。幾年前就已經領教過此人之卑鄙。我以為佢係感情專家，同佢私底下於facebook messenger傾咗一陣，甚至好似有講過吓電話。然後呢？佢轉頭將一部份明顯係私人對話寫咗出嚟擺上網。當時我就知道，此人絕對係小人。」
林作然後指：「最不要得的是，佢最新攻擊我的post裏面一個hashtag講到聽聞我媽媽借財仔畀錢我媾女，呢種毫無事實根據嘅言論，其實對我而言唔叫誹謗中傷我真係唔知係乜。我保留一切追究權利，雖然學我老母話齋『識佢老鼠』。」而王喜昨日亦加入戰團，在fb寫道：「撲糞蒼蠅，猜一條保險sale屎，兩個字。」