【本報訊】旺角上海街一間逾70年歷史、專門印喜帖的老牌印刷公司，昨凌晨遭賊人潛入爆竊，在閣樓留宿的87歲老東主驚醒，勇敢喝退賊人，力保不失。不過，他指本月19日颱風海高斯襲港時，老店曾遭賊人爆竊偷去古董和字畫，令他極為心痛。
現場是旺角上海街722號地下南美公司，專門印刷喜帖、利是封和月曆等，開業超過70年，老店主徐伯87歲，是第二代掌舵人，他指店內兩台德國製的印刷機堪稱古董。
昨凌晨4時許，賊人企圖入內爆竊，其間驚動留宿閣樓的徐伯，他隔門大喝：「有賊呀！拉佢呀！」對方丟低鐵筆、螺絲批等工具逃去，徐伯隨後報警。
徐伯說今次幸好沒有損失，但本月19日颱風襲港期間，相連另一個閣樓被賊人爆竊，當日存放上址的一批古董和金箔紙被洗劫一空。他指損失數字無法估計，「係老竇剩落嘅，冇辦法喇！自己老喇，八十幾九十」。警方稱，上周三東主報稱遭爆竊，損失80卷值4,000元的金箔紙，但沒有呈報失竊古董的情況。
年屆87歲的徐伯年事已高，聽力大不如前，對昔日風光歲月，只剩下點點滴滴。「以前做印務，喺閣麟街，後尾去咗威靈頓街，再嚟呢度」，他坦言與胞兄意見不合，早已分道揚鑣，「佢做印刷，我轉行做燙金，喺呢度七十幾年喇」，店舖是祖傳自置物業。
不過，時移世易，如今講環保，講潮流，傳統的喜帖買少見少，月曆通勝更加極少人買，生意大不如前。徐伯的58歲次子卻對祖業不留戀：「夕陽都唔止呀！日暮西山，冚旗喇！冇人做地舖喇，邊有錢蝕呀？上年下半年開始到𠵱家，好多日都係零（定單）。」他坦言無心守護祖業：「邊有人同錢鬥氣？隔籬茶餐廳月租12萬，我哋26蚊一個日曆，你話要賣幾多個？」他表示只有小量訂利是封的定單，惟總數不及以前十分之一。
至於上周被偷去的古董，他指「好舊嘅嘢，有幾多都唔知，又唔知幾錢，係阿爺剩落」，他估計有20至30件物件和幾幅字畫，但不確定其價值。