新冠肺炎疫情不止，繼續蔓延之下，學校開課還是不開課，全世界政府都為此煩惱。美國特朗普為咗爭取選票，強烈要求全國學校開課，民主黨控制嘅州份一於抗拒。Notre Dame及UNC（北卡羅連納）重開，校園內立即發生疫情數百宗，唯有立即取消課堂教學，改為網上授課。英國政府之首席醫學顧問（Chief Medical Officer）韋提教授（Professor Chris Whitty）最近接受BBC訪問就講出困境：（一）學童在學校染病機會甚低，但在學校疫病或然率不會高於留在家裏；（二）學童染病傳給成年家人之或然率低於成年人互相傳染；（三）學童患新冠肺炎而死亡，絕大多數與本身已有其他長期病患有關；（四）學童上學後有風險，必須嚴加防備，做足安全工夫。
如此說，結論為何？韋提教授結論是：學童上學有風險、但患病或然率低至可忍受，不上學對學童長期成長有傷害，禍及學童之體能及心理健康。新冠肺炎會持續到起碼明年第一季，學童總不能長期困在家內。
以上是英國情況，香港怎應付？楊潤雄講香港要開學不面授，全部學生留家接受網上教學，此命令一出，所有校長、老師、家長皆忙個不休，搞到個個精神緊張，唔怪得楊超發醫生話近日多咗病人求醫抑鬱症。兩星期來，肥仔K日日掛住整理家中電腦網絡，一部自己在家工作用，一部太太同公司開會用，一部畀升上小一嘅大女上課用，為咗怕個女對住電腦易近視，特別將電腦駁上50吋電視，讓女兒用Zoom上課似睇電視。好嘞，8月25日實時上課，肥仔K太太已經返咗工，肥仔K要女兒穿着整齊校服，坐在電視前，距離三呎，準時聽書不夠半小時，女兒已經一片煩悶之色，左望望右望望，一個鐘頭後直情眼皮垂低，唔知老師講乜，十點過後，大廈30幾樓裝修拆地板，雜音轟耳，之後聽到不少陪子女上堂嘅家長冇熄咪大聲講呢樣講嗰樣，到咗11點，電視傳來轟轟聲，原來老師在家授課，佢住嗰棟大廈又有人裝修，因太過嘈吵，老師逼於無奈，宣佈提早下課！肥仔K女兒立即好似出監咁，大聲要求食雪糕！肥仔K話如此上課，似足一場鬧劇。