2014年佔領運動，一班攀山愛好者「香港蜘蛛仔」將巨型直幡掛上獅子山頂，整個東九龍都看到「我要真普選」標語，驚艷畫面長留香港人心中。「蜘蛛仔」早前得悉拆掛片事件，他表示經歷了一年抗爭，香港人已幾度進化，「一張白紙都可以表達到意見」，抗爭火苗已散落社區每一角落，如果警方以為「獅子山好重要，一定唔可以掛嘢」，蜘蛛仔笑言，這樣反映警方「又廢又天真」。
2014年的直幡為雨傘運動打下強心針，亦向市民傳遞抗爭不止於街頭的訊息。六年後今日，香港人將抗爭融入生活，掛直幡只是千百可能性之一。蜘蛛仔直言「我2014年掛完之後，都無去再掛」，因為民意表達嘅方式有好多種，獅子山從來不是一個陣地。
他「諫言」撐政府的人應該打民意戰，「有本事就鬥掛，佢哋可以掛精忠報國愛國愛黨，佢哋掛都無人拉㗎啦」。警方接連在山頭拆掛片，明知影響其他人安全，卻「靜靜雞去做」，若真的光明正大，應該光明磊落在facebook領功。「根本唔使拆任何bolt，直接話直幡違反國安法都得啦」。
攀石愛好者Cat則表示，不論獅子山、魔鬼山抑或筆架山，「𠵱啲係公共地方，大家都有份用」，民安隊及其他團體都常在山頭進行救護、游繩和山藝訓練，需要利用掛片做高空固定，「依家全部都用唔到」。疫情第三波爆發後，已經再無人在山頭掛直幡，警方無緣無故清除掛片，製造安全風險，Cat擔心公共空間收縮之餘，亦感到無奈「警察𠵱家惡晒，都無佢符」。