記唔記得15年前一場車路士對利物浦嘅英超，有位藍軍球僮賽前，喺更衣室通道玩謝拉特嘅一幕？當時球僮喺球員通道拍一拍謝四，要同佢握手，當謝四伸手時候，球僮突然縮手，仲將手放喺自己鼻前扮鬼臉。事隔15年呢個叫尼克拉斯嘅球僮已長大，20歲嘅佢啱啱同南部聯賽球隊比利列卡簽咗球員合約，領隊係踢過熱刺同狼隊嘅奧哈拉，助教係前紅軍左閘高捷斯基。