羅敏莊說，其實從小我的志願是當個酒廊歌手，台下點甚麼歌，她就唱甚麼。唱別人的歌，羅敏莊最拿手，每星期在《Chill Club》，一時《歲月無聲》一時《相思風雨中》，隨時上身。
每隔一段日子，唱回自家的《挑戰者》，網民又再提醒大家，羅敏莊是一把「被遺忘的好聲音」。
已經是25年前的作品了，今年45歲的羅敏莊說：「人總有自己唔同際遇，睇返轉頭，我經歷過，有段時間好開心，亦都有好多朋友，到我𠵱家有一個好家庭，我有一個好老公，我有好可愛嘅女……」
好聲音唱到現在，動聽一點叫做堅持，實際叫搵食呀！「唔係堅持呀，係你仲做到啲乜嘢呢？我仲有乜嘢技能呢？係搵食、係生存！我比較實際，呢行暫時都可以維持到生計，梗係繼續做啦！」
一直唱一直唱，「唔會唱到厭，我好鍾意唱歌，呢個係真事！」興趣真係可以當飯食。
撰文：文嘉龍
攝影：林德雄
羅敏莊的飲歌《挑戰者》，每次一唱都引起網友的洗版。新一輩當新歌聽，上一代人是重溫舊夢。舊調重彈，以為歌者唱得多都會厭，羅敏莊說：「當嗰樣嘢係你鍾意，你所有嘢重複去做你都唔會厭……我係唱歌、有啲人彈琴，有啲人寫書，你重複重複咁做，你會唔會悶？唔會，因為你鍾意！」
鍾意大過天。羅敏莊自小愛聽歌唱歌，她中學畢業後入讀演藝學院，經音樂製作人安格斯發掘入行，「我演藝學院有個師兄，佢話我把聲幾適合唱歌，但係我未喺佢面前唱過歌，佢話總之我覺得你把聲OK啦，你去試音啦！」那位師兄叫Albert，多年以後成為了C AllStar的經理人。
去到安格斯的錄音室試音，羅敏莊選了葉蒨文的《情人知己》，結果一試OK。「第一次入錄音室唱歌係最難忘，因為好多嘢你未接觸過，嗰時已經興卡拉OK，成日都會唱，但係錄音室喎，對我嚟講係一個好神聖嘅地方，戴住耳筒聽返自己把聲，你有乜嘢瑕疵唞氣聲，全部聽得到！我冇驚過，唔識得用個驚字，但係好開心好興奮！一試完音，安格斯即刻打畀我，你究竟幾多歲，嗰時我18歲，佢話我𠵱家要簽你，如果你未夠歲數，我要同你爹哋媽咪講，如果你過咗18歲就唔使！」
羅敏莊的父母幾乎舉腳贊成，因為羅爸爸也是愛聽歌愛唱歌之人，羅敏莊小時候常跟爸媽到酒廊聽歌星唱歌，那時候的羅敏莊最愛聽黑妹（李麗霞）唱歌，多年以後，黑妹成了羅敏莊的契媽。「細個覺得酒廊歌手咁叻嘅？點親乜嘢歌，佢哋都識唱，如果我大個做呢個職業，點乜嘢歌我都識唱，而下面啲觀眾好開心，我就覺得好正！我幻想第時可以做呢份職業，我冇諗過做歌手，而係做一個酒廊歌手！」
每次她和爸媽都要等到黑妹姐晚上11點出場後，聽完才滿足回家。「11點出場」代表那是酒廊的黃金時間，安排在此時段出場的，是酒廊的大紅人。「我哋永遠7點就坐喺酒廊，一路飲嘢食埋飯鋸埋扒，一定要等到佢出場為止先至罷休。你諗吓細路仔去到12點都唔返屋企瞓覺，爹哋媽咪帶你去，細個覺得好犀利！後期見到黑妹姐將呢件事講咗畀佢聽，仲認咗佢做契媽！」
興趣真係可以當飯食。愛唱歌的羅敏莊，入行後經理人安格斯安排她簽約華納，1995年推出第一張細碟再出大碟，《一生也在等（愛我的人）》和《挑戰者》反應俱佳，羅敏莊在1995年度的叱咤頒獎禮獲生力軍女歌手銀獎，金獎是陳慧琳。出道時她的唱腔被評為既似梅艷芳又有劉美君的影子，巧合是，羅敏莊人生第一盒自己買的卡式盒帶，就是劉美君的《午夜情》。
「我自己畀錢嘅第一盒cassette係劉美君，之前唔係自己畀錢嘅有好多，因為我爹哋好鍾意聽歌。我好鍾意梅艷芳，我爹哋又係，《赤色梅艷芳》買咗返嚟，嘩，好好聽呀呢個人唱歌。你由細到大都聽，唱腔俾人話似梅姐，唔多唔少都會跟咗佢呢套去做。」卡式帶，如今說起簡直像史前物品。
拿到新人獎，以為發展順利，奈何之後和經理人出現分歧，羅敏莊在華納出了三張碟後無以為繼，「覺得唔應該再繼續落去，因為我個人好直，有啲乜嘢就講出嚟，我唔會收收埋埋，有唔鍾意或者唔開心就講，可能佢（經理人安格斯）覺得大家有啲嘢唔係好夾囉，同埋當時華納已經變天變得好緊要，黃柏高走、李進入主，我哋好多歌手已經擺埋一、二邊！」李進入主華納，連帶鄭秀文入宮，羅敏莊成棄將之餘，與經理人的合約未完，不得在幕前演出，羅敏莊惟有到港台當幕後接線生。
羅敏莊回憶道：「好唔開心，情緒上都唔係好好，但我亦都好好彩，我有第二班朋友喺電台做，梁奕倫、李志剛，我唔開心嘅時候，有佢哋陪我嘻嘻哈哈，跟住我就做住幕後工作先，電台幕後有乜嘢好做啫，就係聽電話呀、執頭執尾、獎品聯絡呀，同啲聽眾聯絡，包啲禮物畀佢哋呀，嗰時仲有得送禮物，𠵱家就冇，總之你噏得出嘅我都要做！」見到同期出道的歌星出現在電台，人家是接受訪問，自己則是個接線生。人工奀都要做，「你完全冇晒嘢，人工少你都要做㗎啦，得幾千蚊囉，其實已經叫好好，你真係完全冇工作喎！」輾轉到1998年，與經理人合約終於捱完，羅敏莊經當時在無綫藝員部的朋友搭路，順利加入無綫，又再從頭開始，「我冇所謂，做乜都得，由頭嚟過囉，做臨時演員又好、讀訓練班又好，我主持拍劇乜嘢都做！」
到了2010年的《超級巨聲》，羅敏莊在節目中和陳國峰合唱《挑戰者》，巨肺式唱腔令網民驚喜，羅敏莊固然開心，但更實際是搵食機會來了，「我嘅角度係有咁嘅機會，即係我可以再搵錢啦，好實際地做唔同嘅騷可以搵到錢。其實就算我做緊電台嘅時候，我都做緊一啲戶外騷，戶外騷不斷去搵錢幫補自己生活，跟住《超級巨聲》之後覺得，可以登多啲台搵多啲騷。」
搵食最實際，即使羅敏莊2013年離開了服務15年的無綫，她也沒有後悔，一樣走埠登台出騷搵錢。她和老公陳國邦先後離開無綫，兩人心態大不同，老婆大無畏，老公諗多咗！「佢走嘅時候，可能佢個衝擊會大過我，首先佢係一家之主，佢係我屋企嘅家庭支柱，佢覺得如果冇咗份工會好大鑊，身為一個男人！當時我同佢講，唔使驚，我仲有收入，你唔使擔心，你都幾十歲，嗰時佢都接近50歲，我話你50歲仲有幾多年，如果你𠵱家唔選擇走出去睇吓個世界係點，你仲有冇機會？佢自己諗過都覺得係，咪走囉！」
羅敏莊自言在無綫最大收穫是認識到陳國邦，兩人結婚11年，未有女兒陳禛之前，據羅敏莊說，陳國邦的脾氣大到試過掟爛部電視機。「𠵱家講出嚟就好似笑話同埋喜劇囉！佢生咗個女之後脾氣好咗好多，同埋𠵱家老喇，啲火收咗。以前佢脾氣好大，嗰次就係佢話『你信唔信我掟爛部電視機』，跟住我話『唔好唔好』，已經爛咗喇，你冇得再緩和！」
近年夫妻的世界卻近乎零嗌交，以往氣沖沖試過將離婚說出口的晦氣話，沒有再出現了，這與羅敏莊的爸爸在2014年離世有關，「我同佢（陳國邦）講，以後冇一樣嘢可以令我傷心得過呢件事！當你鬧交，『𠵱家離婚啦』呢啲衝口而出兩公婆會講嘅嘢，以前佢講呢啲嘢，我都會好激動，但係有乜嘢傷心啫，爸爸走咗仲傷心啦！因為我同佢講咗一次，佢就唔會再提，同埋我諗佢年紀開始大都有改變。」
快將8歲的女兒陳禛，更加是兩夫妻的潤滑劑。現在人人考慮移民，羅敏莊早在幾年前已有移民泰國打算，她更在當地買了樓，不過遇上這大半年的疫情，打亂了她的大計。「如果唔係因為疫情，我已經帶咗個女去嗰邊面試學校，周圍去面試睇吓邊一間會收佢，如果收咗佢，我哋就過去！」
原先兩公婆的打算是港泰兩邊飛，「我哋應該會飛來飛去，但係原來呢個疫情話畀我哋聽，其實係可以冇晒嘢做，經過呢次之後要重新再諗吓。好似我老公，佢係一個演員，其實一年裏面唔係有好多工作時間，半年佢係會工作，有半年佢係坐喺度㗎咋，所以我會覺得好適合可以飛來飛去，同埋唔係好遠，而我其實喺疫情之前，我仲有好多登台可以周圍唱歌，唱歌又唔係晚晚有得唱，晚晚有得唱我發達啦，一至兩個月有兩至三單，我已經可以維持到一個生計，但係𠵱家疫情原來係可以冇嘢做冇收入，我諗要睇多一、兩年喇！」
說到陳國邦因為疫情已大半年冇工開，藝術家脾氣多愁善感的老公竟然苦中作樂，羅敏莊笑說：「佢𠵱家成日都有好多說話畀我聽，譬如我問佢，老公，借你個電話用一用，佢話，拎去啦，個電話冇人打嚟搵我㗎喇……同佢講，你可唔可以剃吓鬚剪吓頭髮，佢話，冇用㗎啦，使乜剪頭髮剃鬚，都唔使出街……哈哈哈！」
惟有安慰老公，「唔係淨係得佢一個係咁，你都有睇發哥個訪問啦，呢行死晒啦！」冇收入靠咩？「靠積蓄囉！電台囉，同埋𠵱家《Chill Club》都係我一個好好收入來源！」
食老本撐落去，正如《挑戰者》都可以長唱長有，首先都要有本可食！
髮型：Taylor Wan of Hair Corner
場地提供：Pound & Roll