港交所（388）行政總裁李小加明年10月約滿離任，講明如果董事局一早遴選到接班人，佢唔介意早啲走。中環最新傳聞，滙豐亞太區環球銀行聯席主管劉哲寧（Liu Che Ning）有機會問鼎總裁一職。
劉哲寧何許人？Oxford法律系First Hon，Master喺哈佛法律學院讀，學歷無可挑剔。出身美資投行摩根士丹利，最高職位至香港融資部主管，後於2009年轉投滙豐，接替當年退休嘅李慧敏（Rose Lee），做環球銀行中國及香港區主管，簡單而言是一個「跑Deal」跑到上神枱的典型投資銀行家。
要跳到去滙豐呢個職位唔簡單，話晒Rose姐縱橫銀行界40多年，滙豐中國業務江山佢有份打出嚟，接班人少啲能耐都唔得掂。
劉哲寧最強地方，係喺本地大孖沙界有深厚嘅人脈，好多大Deal佢都有份經營。例如長和系世紀重組，滙豐由佢帶領下成為獨家財務顧問；太古（019、087）分拆太古地產（1972），新世界系嘅Deal包括新創建（659）借殼上市、周大福（1929）上市，都有佢嘅身影。
可以預期，如果劉哲寧做到港交所CEO，幫公司跑Deal固然重要，但無可否認李小加鋪咗一條跑道幫佢起機，佢仲可以為港交所貢獻啲乜？
程總裁相信，人民幣計價股票將會係劉哲寧嘅拿手好戲，當年匯賢（87001）上市佢亦有份承銷，Structure同挑戰都了解；兼且，目前政治環境下，人幣國際化已經不是目標，而是為勢所迫的行動，如果佢為港股注入人幣元素，加埋大灣區、理財通乜乜乜，可謂將Stock Connect提升至一個新層次，港交所董事局亦收呢份功課。
李小加八面玲瓏，中國、香港、海外都能夠傾偈，劉哲寧似乎少了中國一瓣，但事實上，他外公是上世紀著名左派電影人，曾負責中共海外統戰；外婆龔秋霞則是上世紀40年代左派紅星，究竟這些政治能量能否世襲？或多或少。
投行生涯充滿銅臭，但劉哲寧過去多年參與不少公職，例如證監會轄下委員會成員，以前更曾參與房委會資助房屋小組委員以及地產代理監管局董事局成員，即街霸代理打交搶客都要Handle，貼到地氣，唔知對爭取CEO一職有冇幫助？
程總裁