香港頭號微生物學家袁國勇教授大名遠播，香港無人不識，政府對佢非常重視，每有住宅大廈發生確診事件，就會搵袁教授到大廈視察環境，提出意見，最近佢領導港大研究團隊發現全球首例，肺炎患者康復後可以再受傳染，消息迅速傳播全球，引起醫學界重視。
如此人物，在其他地區，理應備受尊敬，但香港係一個奇怪地方，有不少玻璃心在此居住，心係玻璃易破碎，腦袋係花崗岩，僵硬無比，思想係單向頻道，拒絕接收自由意識，於是乎，袁國勇因為用真名出咗一篇文章，講新冠肺炎始於武漢，極可能與吃野生動物之文化有關，就畀藍絲恨到入骨，同佢改姓「猿」，又誣衊佢靠抄鍾南山論文成名，總之把袁國勇罵到狗血淋頭，一無是處。
全民檢測計劃（政府叫做普及社區檢測計劃），市民反應冷淡，好似林鄭銅芯口罩咁不受歡迎，睇怕幾難有五百萬人接受檢測。檢測計劃於9月1日正式開始，但已有醫學界潑冷水，例如港大何栢良醫生在商業電台講：最佳檢測時間已過，佢本人不會接受檢測，從科學角度睇（何醫生多次話唔講政治），全民檢測對控制疫情起不到大作用。何醫生立即受大公報評論員李繼亭攻擊（8月25日評論：何栢良與特朗普之間只差一本護照），指何栢良為求出位，口不擇言，林鄭見記者亦上綱上線，指一些「不斷抹黑（全民檢測計劃）嘅所謂專家醫生……只係有一個目的，就係政治計算，就係再搵一件事抹黑中央，破壞香港同埋中央關係嘅目的，我諗唔到有另一個目的。」醫生講吓科學意見卻惹來香港領導人物含沙射影猛烈抨擊，上綱上線，年年考第一女士果真目空一切，香港疫情搞到有第二波第三波，領導人不一日三省吾身，靜思己過，務求改善防疫措施，還來指罵專家破壞中港關係，唔怪得本地疫情不斷！林鄭痛罵後，何栢良咁啱有家務要處理，不再在商台發表意見。何栢良禁聲其實係反映政府已失去公信力，講乜都冇人信，林鄭還講乜嘢管治能力呀？