朗拿甸奴同佢阿哥因為使用假護照入境巴拉圭被捕，坐咗一個月監後，用咗160萬美元保釋，之後俾人軟禁喺阿松森一間豪華酒店四個月，佢兩個嘅認罪協議周一獲得主審法官Gustavo Amarilla正式接納，到周二正式重獲自由。朗拿甸奴以一身黑白色裝束、戴住黑超同黑色口罩現身里約熱內盧國際機場，吸引大批傳媒喺機場等佢，可見呢位前世界足球先生仍然極受關注。根據認罪協議，細哨要罰款90,000美元（約70萬港元），但唔使留案底，佢阿哥羅拔圖就罰11萬美元兼要留案底。另外，細哨返到巴西後可隨時出國，但未來一年要更改永久居所就要先知會巴拉圭當局，羅拔圖就兩年內唔准離開巴西。