今年三月因為使用假護照而喺巴拉圭被捕嘅「細哨」朗拿甸奴，被拘留五個月後喺周一獲釋，同佢罪名相同、同樣入獄一個月後喺巴拉圭首都一家酒店被軟禁咗四個月嘅阿哥羅拔圖亦都重獲自由。
細哨同阿哥兼經理人羅拔圖今年三月到巴拉圭出席慈善活動嗰陣時，因涉嫌使用假護照而雙雙被捕。二人被拘押喺監獄1個月後獲准以合共160萬美元保釋，但係要轉到阿松森一間豪華酒店軟禁，等候當局調查嘅結果。細哨就一直堅稱涉案護照係主辦活動嘅女商人送畀佢哋嘅禮物。
其實佢哋如果罪成就要坐五年監，不過佢哋嘅辯護團隊早前同控方達成認罪協議，周一獲得主審法官正式接納，二人最終重獲自由。認罪協議包括承認行使假護照，結果細哨被罰90,000美元（約70萬港元）同唔使留案底，羅拔圖就被罰110,000美元但就要留案底。